रुसी सेनाले बलात्कार गर्न उक्साहट गरे : युक्रेनी प्रथम महिला
किभ । युक्रेनकी प्रथम महिला ओलेना जेलेन्स्काले रुसी सेनाले आफ्नो देशमा जारी आक्रमणमा बलात्कार र यौन दुर्व्यवहारलाई ‘हतियार’को रूपमा प्रयोग गरिरहेको बताएकी छन् । लन्डनमा द्वन्द्वको समयमा यौन हिंसाबारे अन्तर्राष्ट्रिय सम्मेलनमा बोल्दै प्रथम महिला जेलेन्स्काले उक्त आरोप लगाएकी हुन् ।
४४ वर्षीया जेलेन्स्काले रुसी सैनिकका श्रीमतीले युक्रेनी महिलालाई बलात्कार गर्न उत्प्रेरित गरेको पनि दाबी गरेकी छिन् । रुसले युक्रेनमा हमला गरेदेखि नै आक्रमणकारीहरूले ‘व्यवस्थित र खुला रूपमा’ यौन हिंसा गरेको ओलेनाले बताइन् ।
युक्रेनमा खटिएका रुसी कमान्डरहरुले सेनालाई बलात्कार गर्न उत्प्रेरित गरेको विवरण यसअघि सार्वजनिक भएका थिए ।
