लोसपा गठबन्धन सरकारमा सहभागी हुने
काठमाडौं । महन्थ ठाकुर नेतृत्वको लोकतान्त्रिक समाजवादी पार्टीले पाँच दलीय सत्ता गठबन्धन नेतृत्वको सरकारमा सहभागी हुने निर्णय गरेको छ ।
काठमाडौंमा (सोमबार) बसेको लोसपाका पदाधिकारहरुको बैठकले यस्तो निर्णय गरेको नेता केशव झाले जानकारी दिएका छन् । ‘लोकतान्त्रिक समाजवादी पार्टी (लोसपा) पहिले नै गठबन्धनमा संलग्न छ । सरकारमा जाने ठोस निर्णय गर्नै पर्दैन । तर नयाँ जनादेशपछि बसेको पदाधिकारीहरुको बैठकले सरकारमा जानेबारे निर्णय लिएको हो ।’
यसअघि मंसिर ४ को चुनावमा जनता समाजवादी पार्टी सत्ता गठबन्धनबाट बाहिरिएपछि लोसपा मिसिएको थियो । मधेशका केही स्थामा चुनावी तालमेल भएकाले पनि पनि गठबन्धनको नयाँ सरकारलाई साथ दिएर जाने निर्णय भएको झाले बताएका छन् । झाले यसलाई कार्यकारिणी समितिको बैठकबाट आधिकारिकता दिने बताएका छन् ।
लोसपाले अझेसम्म चुनावी समीक्षा गरिसकेको छैन । कार्यकारिणी समितिको बैठकले चुनावी समीक्षा पनि गर्ने भएको छ । निर्वाचन आयोगले चुनाव सबै परिणाम सार्वजनिक गरेपछि लोसपाको बैठक बस्ने छ । मंसिर ४ को निर्वाचनमा प्रतिनिधि सभातर्फ ४ सिट जितेको लोसपा यस पटक राष्ट्रिय दल हुन भने असफल भएको छ ।