प्रदेश सरकारको नेतृत्व र भागबण्डामा सहमति खोज्न सत्ता गठबन्धनको बैठक बस्दै
काठमाडौं । सत्ता गठबन्धनका दलका नेताहरुको बैठक आज (आइतबार) बस्दै छ । बैठक बिहान १० बजे माओवादी केन्द्र संसदीय दलको कार्यालयमा बस्ने छ ।
बैठकमा पुस २६ गते प्रधानमन्त्री एवम् माओवादी केन्द्रका अध्यक्ष पुष्पकमल दाहाल ‘प्रचण्ड’ ले संसदमा लिने विश्वासको मत र प्रदेश सरकार गठनबारे छलफल हुने प्रचण्ड निकट स्रोतले जानकारी दिएको छ । कुन प्रदेश सरकारको नेतृत्व कुन दलले गर्ने भन्ने विषयमा नेताहरुबीच सहमतिको प्रयास हुने बताइएको छ ।
प्रदेश–१ मा मुख्य मन्त्रीमा दाबी गर्ने आज अन्तिम दिन हो । प्रदेश १ मा सबैभन्दा ठूलो दल एमाले र माओवादी केन्द्र दुवैले दाबी गर्दै आएका छन् । शीर्ष नेताहरुबीच भागबण्डा नमिलेकाले प्रदेश प्रमुख समक्ष कसले दाबी प्रस्तुत गर्ने भन्ने विषय अन्यौल छ । यद्यपि प्रदेश १ मा सबैभन्दा ठूलो दल एमाले भएकाले उसैले मुख्यमन्त्री पाउने सम्भावना छ ।
यसैगरी बागमती र गण्डकी प्रदेश सरकारको नेतृत्वमा दाबी प्रस्तुत गर्ने म्याद भोलि २५ गतेसम्म छ । बागमतीमा एमाले, माओवादी र राप्रपाले मुख्यमन्त्रीमा दाबी गरेका छन् । यस्तै आजै साँझ ५ बजे बालुवाटारमा सत्ता गठबन्धनको अर्को बस्न बस्ने भएको छ । बैठकबाट प्रदेशमा भागबण्डाको टुंगो लगाउने तयारी गठबन्धनको छ । यस्तै आजै सरकारको न्यूनतम कार्यक्रम औपचारिक रुपमा सार्वजनिक समेत गर्ने बताइएको छ ।
