सेभिल्लामाथि बार्सिलोनाको शानदार जित, रियलसँग बढायो अंक दूरी
काठमाडौँ । सेभिल्लामाथि शानदार जित निकाल्दै शीर्ष स्थानको बार्सिलोनाले स्पेनिस ला लिगामा रियलसँगको अंक दूरी बढाएको छ ।
जितसँगै शीर्षस्थानको बार्सिलोनाले दोस्रो स्थानको रियलसँगको अंक दूरी ८ मा पु¥याएको छ । गएराति नै भएको खेलमा रियल मार्लोकासँग पराजित भएको थियो । समान २० खेलबाट बार्सिलोनाको ५३ र रियलको ४५ अंक छ ।
२० खेलबाट २१ अंक बनाएको सेभिल्ला रेलिगेसन जोनभन्दा २ अंकले मात्र माथि छ । आइतबार राति भएको खेलमा बार्सिलोनाले सेभिल्लालाई ३–० गोल अन्तरले पाखा लगाएको हो । बार्सिलोनाको जितमा जोडी अल्बा, गाभी र राफिन्हाले गोल गरे ।
पहिलो हाफ गोलरहित बराबरीमा सकिएको बार्सिलोनाले तिनै गोल दोस्रो हाफमा ग¥यो । खेलको ५८ औँ मिनेटमा जोडी अल्बाको गोलमा बार्सिलोनाले सुरुवाती अग्रता बनाएको थियो ।
खेलको ७० औं मिनेटमा गाभीले गोल गर्दै अग्रता दोब्बर पारे । ७९ औं मिनेटमा राफिन्हाले गोल गर्दै बार्सिलोनालाई ३–० को अग्रता दिलाए । बार्सिलोनाका कप्तान सर्जियो बुस्केट खेलको चौथौं मिनेटमा नै एङ्कल इन्ज्युरीका कारण मैदान छाड्न बाध्य भए । बार्सिलोनाले फेब्रुअरी १६ मा युरोपा लिगको प्लेअफ टाइको पहिलो लेगमा म्यानचेस्टर युनाइटेडसँग खेल्दै छ ।
