योङ रेडफोर्सका केन्द्रीय अध्यक्ष नै पक्राउ, विप्लवलाई लाग्यो यस्तो धक्का
काठमाडौं, १४ बैसाख : नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा) को सहायक संगठन योङ रेड फोर्सका केन्द्रीय अध्यक्ष नै पक्राउ गरेका छन् ।
विवस राई भनिने बाबुराम किरातीलाई प्रहरीले काठमाडौंमा पक्राउ गरेको हो । विभिन्न हिंसात्मक गतिविधिमा संलग्न रहेको अभियोगमा अध्यक्ष राईलाई पक्राउ गरिएको प्रहरी संगठनको उच्च स्रोतले जानकारी दिएको छ । योङ रेड फोर्स नेपालका महासचिव पाटन जङ्गलीले विज्ञप्ति जारी गरेर पक्राउ परेका अध्यक्ष राईलाई तत्काल छाड्न माग गरेका छन् ।
त्यसैगरी प्रहरीले नेकपाको केन्द्रीय सदस्य एवम् काठमाडौं जिल्ला सेक्रेटरी धिरिन्द्रा उपाध्याय, काठमाडौं जिल्ला कार्यालयका सचिव ‘सफल’ र ललितपुर जिल्लाका सेक्रेटरी विपिन क्षेत्रीलाई पक्राउ गरेको छ ।
यसैबीच, नेकपाको भक्तपुर जिल्ला जनसरकार प्रमुख कृष्णराम खड्काले पार्टी परित्याग गरेका छन् । खड्काले बिहीबार विज्ञप्ति जारी गरेर विप्लव नेतृत्वको नेकपाका सबै जिम्मेवारीबाट बाहिरिएको जानकारी गराएका छन् । सरकारले विप्लव कार्यकर्तामाथि निगरानी राख्दै पक्राउ गर्दै आएको छ । सरकारलाई जनसत्ता चलाएर देखाउने चेतावनी दिइरहेका विप्लवलाई केन्द्रीय नेताहरुको पक्राउ एउटा धक्का बनेको छ ।
