सिंहदरबारमा ओलीको उपहार : मोवाइलमा ‘जामर’
काठमाडौं, १४ बैसाख : सिंहदरबार जाँदै भिआइपीको कार्यक्रममा सहभागी हुन जाँदै हुनुहुन्छ ? यसो भए एउटा कुरा जानिराख्नुस् । अब सिंहदरबारमा तपाईले चाहेका बेला मोवाइल सम्पर्क नहुन सक्छ । अथवा सिंहदरबारमा मोवाइलबाटै सल्टिन सक्ने तपाईको कुनै काम प्रत्यक्ष भेटघाट नगरी नहुन पनि सक्छ ।
यसको मुख्य कारण हो सिंहदरवार या बालुवाटारमा क्याविनेट लगायतका महत्वपूर्ण बैठक बस्दा ‘जामर’ प्रयोग गर्न थालिएको छ । ‘जामर’ प्रयोग भएपछि निश्चित क्षेत्रमा मोबाइल फोन सम्पर्क अवरुद्ध बन्छ । नेपाल टेलिकमको अनुमतिमा यो प्रविधि प्रयोग गर्न सकिन्छ ।
यहि कारण शुक्रबार सिंहदरवारस्थित प्रधानमन्त्रीको कार्यालय र आसपासमा २ घण्टा मोबाइल सम्पर्क हुन सकेन । प्रधानमन्त्रीको कार्यालय र त्यसको ५० मिटर वरपर शुक्रबार बिहान १० बजेदेखि १२ बजेसम्म मोबाइल फोन सम्पर्क नभएपछि यसको रहस्य खुलेको हो । शुक्रबार विहान ९ बजे मन्त्रिपरिषद बैठक बोलाइएको थियो । तर, बैठक १० बजे मात्रै शुरु भयो । ‘जब मन्त्रिपरिषद बैठक शुरु भयो त्यसपछि फोन लाग्दै लागेन ।
सूचना चुहिने भन्दै प्रधानमन्त्री कार्यालयकै योजनामा महत्वपूर्ण बैठक बस्दा ‘जामर’ लगाउने गरिएको स्रोतले जानकारी दिएको छ । गृह प्रवक्ता रामकृष्ण सुवेदीले भीभीआइपीको गतिविधि हुँदा निश्चित क्षेत्रमा ‘जामर’ प्रयोग हुने गरेको स्वीकारे । उनले यो यस पटक मात्र नभई पहिल्यैबाट जामर प्रयोग भइरहेको जनाए ।
जामरले के गर्छ ?
मोबाइल फोन जामरले मोबाइल फोनले उत्सर्जन गर्ने बराबरको रेडियो फ्रिक्वेन्सी उत्सर्जित गर्दछ । यसका कारण मोबाइल फोन र मोबाइलको आधार स्टेशनबीचको सञ्चार टुट्छ जसले गर्दा जामरको रेन्जमा रहेका सबै मोबाइल फोनहरु अबरुद्ध हुने गर्छन् । जामरले आधिकारिक मोबाइल सेवालाई अबरोध पुर्याउने भएकाले लाइसेन्स नलिइकन जामरको प्रयोगलाई धेरै देशहरुमा अपराध मानिन्छ । प्रयोगमा हुँदा यस्तो उपकरणले इमरेन्जी सेवालाई पनि अवरोध पु¥याउने सम्बन्धित क्षेत्रका जानकार बताउँछन् ।