हामी दुई दाजु–भाइ, अब वैरभाव सकियो : दुई कोरियाली नेता
काठमाडौं, १४ बैसाख : ६५ वर्षपछि पुनर्मिलन गरेका दुई कोरियाली प्रायदीपका नेताहरुले आफूहरु दाजु–भाइ भएको भन्दै अब दुई देशबीचको वैरभाव अन्त्य भएको दावी गरेका छन् ।
अन्तर कोरियाली सम्मेलनका दौरान दुवै कोरियाका नेताहरुले संयुक्त वक्तव्य जारी गर्दै दुई देशबीचको वैरभाव अन्त्य भएको घोषणा गरेका हुन् । संयुक्त वक्तव्यमा हस्ताक्षरपछि बोल्दै दक्षिण कोरियाली राष्ट्रपति मून जे इनले कोरियाली प्रायद्वीपलाई आणविक हतियाररहित बनाउने तथा आजका मितिदेखि दुई कोरियाबीच युद्ध नहुने घोषणा गरे ।
आफ्नो वक्तव्यका क्रममा उत्तर कोरियाली नेता किम जोङ उनले दुवै देश वास्तवमा एउटै देश, एउटै रगत र एउटै संस्कृति भएकोे र शान्तिको नयाँ युगप्रति आशावद्ध भएको बताएका छन् । किम र इन दुवैले पानमुनजोम घोषणा जारी गर्दै आपसी समझदारी, समृद्धि तथा शान्तिको नयाँ युगको शुभारम्भ गरेको बताएका छन् ।
सन् १९५३ देखि रहेको दुई देशबीचको तीतो सम्बन्ध ६५ वर्षपछि दुवै देशका राष्ट्राध्यक्षबीच दक्षिण कोरियाली भूमिमा औपचारिक भेटघाटका बीच अन्त्य भएको छ । अन्तर्राष्ट्रिय वृत्तमा यो प्रयासलाई ऐतिहासिक कदमका रुपमा लिइएको छ । यो वार्ताले मूर्त रुप लिन सके दुवै देशका बीच सौहार्द्रता सुमधुर हुनेछ ।
पुलमा वार्ता, सामूहिक वृक्षारोपण
उत्तर कोरियाली सर्वोच्च नेता किम जोङ उन र दक्षिण कोरियाका राष्ट्रपति मुन मुन जे इनबीचको ऐतिहासिक वार्ता बनेको छ । शुक्रबार उत्तर कोरियाली नेता किम जोङ उन ले पहिलो पटक क्षिण कोरियाको असैन्य भूमिमा पाइला टेकेका थिए । त्यसयता उच्चस्तरीय वार्ता चलिरहेको छ । 
नेताबीच दक्षिण कोरियाली भूमिमा पर्ने पुनमुनजोमस्थित पीस हाउमा वार्ता भएको छ । दुई नेताले पुलमा बसेर पनि वार्ता गरेका छन् । लञ्ज ब्रेकपछि किम र मुनले पैदल हिंड्न बनाइएको पुलमा बसेर कुराकानी गरेका हुन् । लगतै वृक्षारोपण गरेका छन् । दुबैले बेल्चाबाट माटो हालेपछि हात मिलाएका थिए । शान्ति र समृद्धिको सन्देश दिन सामूहिक रुपमा रुख रोपेका हुन् । वार्ताका क्रममा किमले सोलमा रहेको ब्लू हाउस भ्रमण गर्ने इच्छा व्यक्त गरेका छन् । साथै राष्ट्रपति मुनलाई प्योङयाङ भ्रमणको निम्तो समेत दिएका छन् । तस्विर : रोयटर्स
