संघीयताप्रतिको चुलिँदो वितृष्णा वर्तमान प्रणाली असफलताको पहिलो खुड्किलो : कोइराला
‘अर्थतन्त्रको संकट समाधानमा प्रधानमन्त्रीले इच्छा शक्ति देखाएर मात्रै हुँदैन’
काठमाडौं । नेपाली कांग्रेस सांसद डा. शेखर कोइरालाले नागरिकको विश्वास र संसदको समर्थनबाट देशमा देखा परेको अर्थतन्त्रको संकट सम्बोधन गरेर समृद्धिको यात्रा तय गर्न सकिने बताएका छन् । आज (आइतबार) प्रतिनिधिसभाको विशेष समयमा बोल्दै सांसद कोइरालाले देशमा देखिएको अर्थतन्त्रको संकट समाधानमा प्रधानमन्त्रीले देखाएको इच्छा शक्तिले मात्रै केही नहुने बताएका छन् ।
उनले भने, ‘अर्थतन्त्रको संकट समाधानमा प्रधानमन्त्रीले इच्छा शक्ति प्रदर्शन गरेर मात्रै पुग्दैन । त्यसका लागि सम्पूर्ण मन्त्रिमण्डललाई नैतिकरुपमा तलमाथि गर्न नदिने प्रण गर्नुपर्छ ।’
समाजवाद भ्रष्टाचारको जगबाट नआउने बताउँदै उनले समसामयिक न्यायिक समाज बनाउन सम्यक विचार, व्यवहार र दृष्टिकोण चाहिने बताए । उनले साझा संकल्प र प्रयत्नबाट अर्थतन्त्रलाई चलायमान बनाउन निजी क्षेत्रको विश्वास जित्न सक्नुपर्नेमा जोड दिए । विश्वबाट लगानीको अवसरहरू नेपाल भित्र्याएर बेरोजगारीलाई सम्बोधन गर्न सम्भव हुने उनको भनाइ छ ।
उनले विश्वव्यापी रुपमा बैंकिंग क्षेत्रको विश्वसनीयता माथि प्रश्न उठिरहेको भन्दै हाम्रो देशले पनि युरोप र अमेरिकामा देखिएको जस्तो बैंकिंग संकटको सामना गर्नु नपरोस् भनी अपनाउनुपर्ने मौद्रिक नीतिलाई बेलैमा विज्ञ विशेषज्ञको सल्लाहबाट अगाडि बढाउनुपर्ने बताएका छन् ।
राजनीतिक नेतृत्वमा आम जनताको विश्वास घटेपछि सबल अर्थतन्त्र धरासायी बन्न समय नलाग्ने उनले बताए । अहिलेको असहजताको सम्बोधन परम्परागत टालटुलले विधिबाट नभइ दीर्घकालीन रुपमै निकास खोज्न सरकार जाग्नुपर्ने बताए ।
उनले थपे, ‘अहिलेको असजताको सम्वोधन परम्परागत टालटुले विधिबाट होइन दीर्घकालीन रुपमै निकास निस्कने गरी सरकारले काम गरोस् । एकातिर कर्जाको मागमा कमी आएको छ भने अर्कोतिर बैंकहरुको खराव कर्जाको अनुपात वढ्दैछ । त्यति मात्र नभई बैंक तथा वित्तीय संस्थावाट लिएको कर्जा नतिर्न विभिन्न प्रतिकार समितिहरु गठन हुनु र सरकार टुलुटुलु हेरेर बस्नु कदापी राम्रो संकेत हैन । त्यस्तो अपराधिक प्रवृत्तिको तुरुन्त उपचार गरिहाल्नु पर्छ ।’
संघीयताप्रति चुलिएको वितृष्णा राजनीतिक प्रणालीको असफलताको पहिलो खुड्किलो भएको कोइरालाको भनाइ थियो । ‘हाम्रा आफ्नै विगतका कमी–कमजोरीले संघीयता, प्रदेश संरचनाप्रतिको वितृष्णा दिन प्रतिदिन चुलिँदो छ,’ कोइरालाले भने, ‘यो हाम्रो राजनीतिक प्रणालीको असफलताको पहिलो खुड्कलो हो भन्ने मलाई लाग्छ ।’
