विशेषले सफाइ दिएको फैसलाविरूद्ध अख्तियारद्वारा सर्वोच्चमा पुनरावेदन
काठमाडौं । अख्तियार दुरूपयोग अनुसन्धान आयोगले विशेष अदालतले फैसला गरेका मुद्दामा चित्त नबुझेको भन्दै सर्वोच्च अदालतमा पुनरावेदन गरेको छ ।
विशेष अदालतबाट विभिन्न मितिमा फैसला भएका मुद्दामध्ये सार्वजनिक सम्पत्ति हानी नोक्सानी गरी भ्रष्टाचार गरेको सम्बन्धी मुद्दामा पुनरावेदन गरेको अख्तियारका प्रवक्ता भोला दाहालले जानकारी दिएका छन ।
उनका अनुसार विशेष अदालतले सरकारी रकम हिनामिना गरी भ्रष्टाचार गरेको मनोजकुमार झा प्रतिवादी रहेको मु्द्दामा चैत्र १२ गते सफाइ दिएको थियो । तोकिएको प्रक्रिया पूरा गरी रकम फर्छ्यौट गरेको देखिएकाले झाले रकम हिनामिना गरेको भन्न नमिल्ने भन्दै विशेषले सफाइ दिएको थियो ।
तर, आयोगले प्रतिवादी झाले भ्रष्टाचार निवारण ऐन, २०५९ को दफा १७ बमोजिमको कसुरमा ३ लाख ५९ हजार १३८ रुपैयाँ हानी नोक्सानी गरेको ठहर गर्दै सोही रकम बराबरको बिगो माग गरेको छ ।
