युवा संघको नवौं महाधिवेशन आजदेखि : अध्यक्ष ओलीले उद्घाटन गर्दै
नेपालगञ्ज । (नेकपा एमाले) को भातृ संगठन राष्ट्रिय युवा संघ नेपालको नवौं राष्ट्रिय महाधिवेशन आज सोमबारदेखि बाँकेको नेपालगञ्जमा सुरू हुँदैछ । आज सोमबारदेखि चैत २९ गतेसम्म हुने महाधिवेशनको सम्पूर्ण तयारी पूरा भएको नवौं राष्ट्रिय महाधिवेशन आयोजक समितिले जनाएको छ ।
एमाले अध्यक्ष तथा पूर्व प्रधानमन्त्री केपी शर्मा ओलीले उद्घाटन गर्ने महाधिवेशनको उद्घाटन समारोहलाई भव्य बनाउन सम्पूर्ण तयारी पूरा भएको युवा संघका अध्यक्ष किरण पौडेलले जानकारी दिए । उनका अनुसार उद्घाटन समारोहमा देशभरबाट दुई हजार भन्दा बढी प्रतिनिधिसहित १० हजार बढी नेता कार्यकर्ता सहभागि हुनेछन् ।
महाधिवेशनका लागि कोहलपुरदेखि कार्यक्रमस्थल नेपालगञ्जको होटल स्नेहसम्म प्रचार सामग्री र स्वागतद्वारले विशेषरुपमा सजाइएको छ । उद्घाटन समारोहमा कलाकार बद्री पंगेनी, राजा राजेन्द्र, अस्मिता अधिकारी, रवि वड लगायतले सांगीतिक प्रस्तुति दिने कार्यक्रम रहेको छ ।
महाधिवेशनले सर्वसम्मत नयाँ नेतृत्व चयन गर्ने बताइएको छ । महाधिवेशन उद्घाटन समारोहमा एमाले अध्यक्ष ओलीसँगै उपाध्यक्ष रामबहादुर थापा (बादल), महासचिव शंकर पोखरेल, स्थायी कमिटी सदस्य एंव मोर्चा संगठन इञ्चार्ज भानुभक्त ढकाल, पोलिटब्यूरो सदस्य महेश बस्नेतलगायतका नेताहरु सहभागी हुनेछन् ।
