सिटी सेमिफाइनल प्रवेश, फाइनलमा पुग्न रियलसँग भिड्ने
काठमाडौँ । बार्यनल म्युनिखलाई पराजित गर्दै म्यानचेस्टर सिटी युरोपियन च्याम्पियन्स लिगको सेमिफाइनल प्रवेश गरेको छ । फाइनल भिडन्तका लागि रियल मड्रिडसँग भेट गरेको छ ।
गए राति भएको क्वार्टर फाइनलको दोस्रो लेगमा बार्यनलाई १–१ को बराबरीमा रोक्दै सिटी समग्रमा ४–१ को नतिजा निकाल्दै अन्तिम ४ मा पुगेको हो । क्वार्टर फाइनलको पहिलो लेगमा ३–० ले पछि परेको बार्यनको दोस्रो लेगमा बराबरीमा रोकिएपछि अघिल्लो चरण पुग्ने सम्भावना सकिएको हो ।
सिटीले अब फाइनल प्रवेशका लागि रियल मड्रिडको सामना गर्नेछ । खेलको ५७ औँ मिनेटमा हालान्डको गोलमा सिटीले सुरुवाती अग्रता बनाएको थियो । पछिल्लो समय उच्च लयमा रहेको हालान्डले डी ब्रुयनको पासमा गोल गरेका थिए ।
तर खेलको ८७ औँ मिनेटमा किममीचको पेनाल्टी गोलमा बार्यनले बराबरी गोल फर्काएको थियो । पहिलो लेगमा नै पछि परेको बार्यनले पुनरागमन गर्न नसक्दा क्वार्टर फाइनलबाटै च्याम्पियन्स लिगको यात्रा सकाएको हो । सेमिफाइलको पहिलो लेग ९ मे मा हुनेछ ।
