नौं वर्षमा नेपाल–भारत सम्बन्ध ‘हिट’ भयो, अब ‘सुपरहिट’ बनाउने सम्झौता भएको छ : मोदी
‘नेपालबाट आउँदो १० वर्षमा १० हजार मेगावाट विजुली आयात गर्छौ’
नयाँदिल्ली । भारतका प्रधानमन्त्री नरेन्द्र मोदीले नेपाल भारतबीचको सम्बन्ध नौं बर्षमा ‘हिट’ भएको र अब ‘सुपरहिट’ बनाउने गरी महत्वपूर्ण निर्णय भएको बताएका छन् ।
दुई देशको सम्बन्ध अगाडि बढाउन पेट्रोलियम पाइपलाइन, बिजुली आयात, हाइड्रो, रेलमार्गलगायतका क्षेत्रमा महत्वपूर्ण निर्णय भएको उनले बताएका छन् । आज (बिहीबार) नयाँ दिल्लीको हैदरावाद हाउसमा प्रधानमन्त्री पुष्पकमल दाहाल ‘प्रचण्ड’ सँगको भेटवार्ता पछि पत्रकार सम्मेलनमा बोल्दै प्रधानमन्त्री मोदीले दुई देशबीचको सम्बन्ध सुपरहिट बनाउने निर्णय गरेको बताए ।
उनले भने, ‘भारत नेपालबीचको सम्बन्ध सुन्दर छ । नेपालको विद्युत निर्यात भइरहेको छ । अनेक क्षेत्रमा विभिन्न उपलब्धी हाँसिल गरेका छौ । तल्लो अरुण, फुकोट कर्णाली, पेट्रोलियम पाइप लाइन, क्रस बोर्डर पेमेन्टलगायत समझदारीमा हस्ताक्षर भएको छ ।’ मोदीले लङ टर्म पावर ट्रेड एग्रीमेन्ट भएको बताए । उनले २०१४ मा प्रधानमन्त्रीको कार्यभार सम्हालेको तीन महिनाभित्र नेपाल भ्रमण गरेको स्मरण गरेका थिए ।
‘नेपालबाट आउँदो १० वर्षमा १० हजार मेगावाट विजुली आयात गर्छौ’
भारतका प्रधानमन्त्री नरेन्द्र मोदीले आउँदो १० वर्षमा नेपालबाट १० हजार मेगावाट बिजुली आयात गर्ने लक्ष्य राखेको बताएका छन् । प्रधानमन्त्री पुष्पकमल दाहाल ‘प्रचण्ड’ को भारत भ्रमणका क्रममा दुवै देशका प्रधानमन्त्रीको संयुक्त पत्रकार सम्मेलनमा बोल्दै मोदीले नेपाल र भारतको सम्बन्धलाई नयाँ उचाइमा पु¥याइने बताए । यसका लागि दुवै देशका प्रधानमन्त्रीले विभिन्न निर्णय गरेको बताएका छन् ।
नेपालसँग जलविद्युत सम्बन्धी दीर्घकालिन सम्झौता भएको मोदीले बताएका छन् । ‘अहिले नेपालबाट ४५० मेगावाटा बिजुली आयात गरिरहेका छौं’, भारतीय प्रधानमन्त्री मोदीले भने, ‘आउँदो १० वर्षमा नेपालबाट १० हजार मेगावाट बिजुली आयात गर्ने लक्ष्य राखेका छौं ।’
