‘गेरू वस्त्र’ धारणबारे प्रधानमन्त्रीले भने, ‘अहिले म कम्युनिष्ट मात्र होइन, प्रधानमन्त्री पनि हुँ’

‘श्रीमतीलाई ठिक हुन्छ भनेर महाकालेश्वर मन्दिरमा रुद्राक्ष चढाएको होइन’


२० जेष्ठ २०८०, शनिबार
Prachanda back t india 4 1 scaled

काठमाडौं । प्रधानमन्त्री पुष्पकमल दाहाल ‘प्रचण्ड’ ले भारतको मध्य प्रदेश राज्यस्थित उज्जेन सहरमा रहेको प्रसिद्ध महाकालेश्वर मन्दिरको पूजालाई ‘सांस्कृतिक कूटनीति’ को रुपमा बुझ्न आग्रह गरेका छन् ।

भारतको चार दिने औपचारिक भ्रमण सकेर शनिबार साँझ नेपाल फर्किएका प्रधानमन्त्री प्रचण्डले विमानस्थलमा सञ्चारकर्मीसँग कुराकानी गर्दै ‘गेरु वस्त्र’ लगाएर भारतका अर्बौं जनताको मन जित्ने काम आफूले गरेको बताएका छन् । ‘म कम्युनिस्ट मात्र होइन, प्रधानमन्त्री पनि हो नि त । मसँग हुने सेक्युरेटिले सकेसम्म गेरु वस्त्र नलगाउन निकै बल गर्नुभयो । तर त्यहाँ लाउनै पर्ने नीति रहेछ । मैले त्यहाँ लाउँदिन भनेको भए के हो नेपाल सरकार भनेर भारतका अर्बौं मान्छेको मन खुशी भएको छ,’ प्रधानमन्त्री प्रचण्डले भने ।

प्रधानमन्त्री प्रचण्डले उक्त अवतार आफ्नो पूरानो भएको पनि बताए । ‘नयाँ होइन यो मेरो पुरानै अवतार हो । म मुस्लिम कम्युनिटीको कार्यक्रममा गएर मुस्लिम भएको देख्नु भएको छ कि छैन ? क्रिश्चियनको गिर्जा घरमा गएर मन्त्र जपेको फोटो छ कि छैनन् ?,’ उनले भने, ‘बुद्धिस्टकोमा जान हुने हिन्दूकोमा जान नहुने त हुँदैन नि ।’

‘श्रीमतीलाई ठिक हुन्छ भनेर महाकालेश्वर मन्दिरमा रुद्राक्ष चढाएको होइन’
प्रधानमन्त्री प्रचण्डले पत्नी सीता दाहालको स्वास्थ्य ठिक हुन्छ भनेर आफूले महाकालेश्वर मन्दिरमा रुद्राक्ष नचढाएको स्पष्ट पारेका छन् । भारत भ्रमणका क्रममा शुक्रबार भारतको मध्य प्रदेश राज्यस्थित उज्जैन सहरमा रहेको प्रसिद्ध महाकालेश्वर मन्दिरमा पूजा गरेका थिए ।

त्यसबारे सामाजिक सञ्जालमा भएका टिप्पणीप्रति जवाफ दिँदै प्रधानमन्त्री प्रचण्डले परराष्ट्रमन्त्री एनपी साउदको इच्छामा रुद्राक्ष बोकेर गएको पनि बताए । ‘मिडियामा आएको देखें मैले । रुद्राक्ष, यो लाने इनिसियटिभ्स परराष्ट्रमन्त्रीको हो । उहाँले यो लानुपर्छ भनेपछि हुन्छ तपाईंले लानु हुन्छ भने राम्रै हुन्छ भनेको हो मैल । उहाँले लगेकोलाई मैले नछुने अब ?,’ प्रधानमन्त्री प्रचण्डले भने ।
उक्त रुद्राक्ष चढाउनेबारे आफ्नो दिमागमा नभएको पनि प्रचण्डले बताएका छन् । ‘त्यो चढाएको श्रीमतीको स्वास्थ्य ठिक हुन्छ भनेर विल्कुल होइन । त्यो मेरो दिमागमा थिएन, अहिले पनि छैन । यहाँ पत्नीको स्वास्थ्यका लागि रुद्राक्ष दियो भनेर तल झारिदिने क्या ?,’ प्रधानमन्त्री प्रचण्डले भने ।

पत्नी दाहालको स्वास्थ्य अवस्थाबारे जानकारी दिँदै उनले निको नहुने खालको रोग लागेको जानकारी गराए । ‘मेरो पत्नीको स्थिति के छ तपाईंहरु सबैलाई थाहा छ । उनको बिमार निको हुने खालको नै होइन । म कस्तो प्रवृत्तिको मान्छे तपाईंहरुलाई थाहा छ’, प्रधानमन्त्री प्रचण्डले थपे, ‘अनि म महाकालेश्वर गएर पत्नी बचाइ पाउँ भन्छु होला त ? त्यसको केही अर्थ हुन्छ । मान्छेले गर्ने पनि सीमाभित्र बसेर गर्नु प¥यो, त्यो अलि बढी भयो ।’

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७