सुनकाण्डबारे सरकारलाई एमाले महासचिव पोखरेलका पाँच प्रश्न
काठमाडौं । प्रमुख प्रतिपक्षी नेकपा एमालेका महासचिव शंकर पोखरेलले सुन तस्करी प्रकरणबारे सरकारलाई पाँच प्रश्न गरेका छन् । उनले आरोपित सबैलाई छानबिनको दायरामा ल्याउन माग पनि गरेका छन् । पहुँचवाला कसैको हात बिना यति ठूलो परिमाणमा सुन तस्करी हुन नसक्ने महासचिव पोखरेलको आशंका छ ।
उनले फेसुबुकमा लेखेका छन्
सुन प्रकरणमा सत्तामा रहेका विशेषगरी माओवादी पक्षधरहरूबाट अरुको गालामा बिया टाँस्ने धन्दा जारी छ । उनीहरूबाट जो सत्तामा छ उसँग प्रश्न गर्नु भनेको अपराध हो भन्ने भाष्य खडा गर्न खोजिँदैछ । के कुनै एउटा राम्रो काम गरेका आधारमा सत्तापक्षधरहरूले सबै प्रकारका कमजोरीबाट उन्मुक्ति पाउनु पर्छ भन्ने सत्तापक्षीय दृष्टिकोण हो ? १०० किलो सुन प्रकरणमा पनि त राजश्व अनुसन्धान विभागको नेतृत्वले जस पाएकै छ । बाहिर सुन समातिएका आधारमा एअरपोर्टको सुरक्षा प्रणाली र भन्सार प्रशासनले उन्मुक्ति पाउँछ र ? अनि त्यसको नेतृत्व गर्ने सरोकारवाला नेतृत्वमाथि प्रश्न उठाउने कुरा अनुचित हुन्छ र ? हुँदैन । सत्ताको नेतृत्व गरिरहेको सरोकारवाला निकायले यी प्रश्नहरूप्रति जवाफदेही बन्नै पर्दछ ।
१. एअरपोर्ट भन्सारबाट १०० किलोभन्दा बढी सुन बाहिरिएको तथ्य सुराकीले दिएको सूचनाका आधारमा राजश्व अनुसन्धान विभागको टोलीले समात्न सफल भएको घटनाबाट पुष्टि भएको छ । के यसमा एअरपोर्टको सुरक्षा प्रणाली र भन्सार प्रशासनको मिलोमतो र जानकारीबिना यस्तो कुरा सम्भव हुन्छ ?
२. नेपालमा अधिकांश भारतीय उत्पादनका मोटरसाइकल प्रयोगमा छन् । तर मोटरसाइकलको उपकरण चाहिँ हङकङबाट त्यो पनि हवाईमार्गबाट पटक–पटक आउनुलाई के स्वाभाविक मान्न सकिन्छ ? यसमा राज्यका निकायको ध्यान जानुपर्ने होइन ?
३. आयातकर्ता कम्पनीको मालिक एकजना दैनिक ज्यालादारीमा काम गर्ने अबोध मजदुर रहेको तथ्यले यो गिरोह कति धुर्त र पहुँचवाला रहेछ भन्ने देखिन्छ । यति ठूलो पैमानमा कारोबार हुने कम्पनीका बारेमा सरकार यसरी बेखबर बस्न मिल्दछ र ? अबोध मजदुरलाई प्रयोग गरेर कम्पनी दर्तागर्ने र कारोबार गर्नेहरू को हुन् ? राज्यका निकायले खोज्नु पर्दैन ? सत्यतथ्य बाहिर ल्याउनु पर्दैन ?
४. कतै यस प्रकरणमा राजश्व अनुसन्धान विभागमा नयाँ नेतृत्व आएका कारणले वा गिरोहका बीचमा विवाद भएका कारणले तस्करीको योजना असफल भएको त होइन भन्ने कुरालाई आधार बनाउने हो भने यसअघि पनि यसरी नै ठूलो पैमानामा सुन तस्करी भएको देखिन्छ । के अनुसन्धान त्यहाँसम्म पुग्नु आवश्यक छैन र ?
