भारतले वेस्ट इण्डिजलाई हरायो
काठमाडौँ । पहिलो एक दिवसीय अन्तर्राष्ट्रिय क्रिकेटमा भारतले वेस्ट इण्डिजलाई पाँच विकेटले पराजित गरेको छ । गए राति बारबाडोसको केंसिंग्टन ओभलमा भएको खेलमा वेस्ट इण्डिजले दिएको ११५ रनको सामान्य लक्ष्य भारतले ५ विकेट गुमाएर २२ ओभर ५ बलमै पूरा गर्यो । भारतका लागि ईशान किशानले सर्वाधिक ५२ रन बनाए । बलिङतर्फ वेस्ट इन्डिजका गुदकेश मोतीले २ विकेट लिए ।
यसअघि घरेलु मैदानमा टस हारेर ब्याटिङ गरेको वेस्ट इण्डिज २३ ओभरमा ११४ रनमा अलआउट भयो । वेस्ट इण्डिजका लागि शाई होपले सर्वाधिक ४३ रन बनाए । बलिङतर्फ भारतका कुलदीप यादवले ४ र रविन्द्र जडेजाले ३ विकेट लिए ।
यो जितसँगै भारतले ३ खेलको श्रृङ्खलामा १–० को अग्रता लिएको छ । यसअघि भएको २ खेलको टेस्ट श्रृङ्खला भारतले १–० ले जितेको छ । यी दुई टोलीबीच ५ खेलको टी–२० श्रृङ्खला पनि हुनेछ ।
