पेरिसडाँडामा माओवादी पदाधिकारी बैठक जारी
![mao cm scaled](https://www.nayapage.com/wp-content/uploads/2023/08/mao-cm-scaled.jpg)
काठमाडौँ । सत्तारुढ नेकपा माओवादी केन्द्रको पदाधिकारी बैठक पार्टीको केन्द्रीय कार्यालय (पेरिसडाँडा) जारी छ । माओवादीले १३ महिनापछि आज केन्द्रीय समितिको बैठक बस्दैछ । त्यसअघि पदाधिकारी बैठक बसेको हो ।
काठमाडौंस्थित प्रज्ञा भवनमा बिहान ११ बजे सुरु हुने केन्द्रीय समितिको बैठकका एजेण्डाबारे छलफल गर्न पेरिसडाँडामा पदाधिकारी बैठक बसिरहेको हो । केन्द्रीय समिति बैठकको सुरुमा महासचिव देव गुरुङले एजेण्डा प्रस्तुत गर्नेछन् । त्यसपछि अध्यक्ष पुष्पकमल दाहाल ‘प्रचण्ड’ ले राजनीतिक प्रतिवेदन पेस गर्ने कार्यतालिका छ ।
![Mao padadhikari](https://www.nayapage.com/wp-content/uploads/2023/08/Mao-padadhikari-768x447.jpg)
केन्द्रीय समिति बैठकका लागि गत सोमबार बसेको माओवादी पदाधिकारी बैठकले केही एजेण्डा तय गरिसकेको छ । जसअनुसार नेताहरूको जिम्मेवारी बाँडफाँट, संगठन विस्तारका लागि तीन महिने अभियान घोषणा, विशेष महाधिवेशन र विधान महाधिवेशन तथा समसामयिक विषयअन्तर्गत सरकार, सदनलगायत एजेण्डा छन् ।
बैठकमा ३८५ जना केन्द्रीय सदस्य, १९८ वैकल्पिक केन्द्रीय सदस्य, प्रदेश समितिका १०० जना पदाधिकारी तथा निर्वाचन आयोग, अनुशासन आयोग र लेखा आयोगका ७५ जना गरी ७ सय ५८ जनाले भाग लिने माओवादी केन्द्रले जनाएको छ । यसअघि २०७८ पुसमा भएको महाधिवेशनपछि २०७९ असारमा पहिलोपटक माओवादी केन्द्रको केन्द्रीय समितिको बैठक बसेको थियो । जसले पार्टी महासचिवमा देव गुरुङलाई चयन गरेको थियो ।