मकवानपुरमा पहिरोले घर पुर्दा एकको मृत्यु, ६ जना बेपत्ता
मकवानपुर । मकवानपुरको बागमती गाउँपालिका सिक्रेनीमा पहिरोले घर पुरिँदा एक जनाको ज्यान गएको छ भने ६ जना बेपत्ता भएका छन् ।
जिल्ला प्रहरी कार्यालय मकवानपुरका डिएसपी टेकबहादुर कार्कीले राति पहिरोले सात जना पुरिएको र एक जनालाई उद्धार गरेर अस्पताल लैजाँदै गर्दा बाटोमै ज्यान गएको हो । अरु ६ जनाको खोजी कार्य जारी छ । लगातारको बर्षाका कारण गएको पहिरोले घर पुरिएको हो । खानिखोला गाउँपालिका अध्यक्ष इन्द्र थिङका अनुसार खानिखोला–५ घर भई बागमती गाउँपालिका गएका एकै परिवारका सात जना सिक्रे पहिरोले पुरिएका हुन् ।
पुरिनेहरुमा अक्कलबहादुर स्याङतान, उनकी श्रीमती शान्तिमाया स्याङतान, छोरी–ज्वाई शिला स्याङतान र जीवन पहरी छन् । साथै उनीहरुका दुई सन्तान साढे दुई बर्षीय छोरा र साढे एक वर्षका छोरा पुरिएका छन् । पुरिएकामध्ये कसको मृत्यु भएको भन्ने खुलिसकेको छैन ।
अविरल वर्षातका कारण खानिखोला–५ मा रहेको दोश्रो लघु जलविद्युत्तको पावर हाउस पुरिएको छ भने भवन पनि जोखिममा रहेको छ । अरनिको राजमार्गको बनेपास्थित पुलबजार डुबानमा परेको छ । बनेपाकै १४ पेरुङ्गे सामुदायिक वन सँगै एउटा घर जोखिममा परेको प्रहरीले बताएको छ । उद्धारका लागि नेपाली सेना कालीजंग गण र प्रहरीको टोली घटनास्थल पुगेको छ । जिल्ला स्थित विपद ब्यवस्थापन समितिले नागरिकहरुलाई सुरक्षित रहन र विपद परेमा तत्काल सम्पर्क गर्न अनुरोध गरेको सूचना सार्वजनिक गरेको छ ।
प्रमुख जिल्ला अधिकारी पुण्यविक्रम पौडेलले मातहतका सबै सुरक्षा निकाय तथा कर्मचारी र जनप्रतिनिधिहरुलाई समेत नागरिकहरुको खोज, उद्धारमा लाग्ने गरी तयारीमा रहन अनुरोध गरिएको बताए ।
