सन्दीप एशिया कपका लागि दोहा हुँदै पाकिस्तान जाँदै
काठमाडौं । नेपाली राष्ट्रिय क्रिकेटर सन्दीप लामिछाने एसिया कप २०२३ मा सहभागी हुन आज (सोमबार) पाकिस्तान जाँदैछन् । सन्दीपविरुद्धको मुद्दाको अर्को पेशी भदौ २१ गतेका लागि तोकिएपछि उनी आज बिहान साढे १० बजे कतार एयरवेजमार्फत पाकिस्तान प्रस्थान गर्न लागेका हुन् ।
सन्दीपविरुद्धको मुद्दाको आइतबार पनि सुनुवाइ नभएपछि उनी आज एसिया कप खेल्नका लागि पाकिस्तान जान लागेको नेपाल क्रिकेट संघ क्यानका कार्यवाहक सचिव दुर्गाराज पाठकले जानकारी दिए । एसिया कपमा सहभागी हुन नेपाली टोली मंगलबार नै पाकिस्तान गैसकेका छन् ।
सन्दीप भने मुद्दाको पेसीका कारण रोकिएका थिए । एशिया कपमा समूह ‘ए’ मा रहेको नेपालले भदौ १३ गते पाकिस्तानसँग मुल्तानमा र भदौ १८ गते श्रीलंकाको क्यान्डीमा खेल्ने छ । एसीसी प्रिमियर कपको च्याम्पियन बन्दै नेपालले एशिया कपमा स्थान बनाएको थियो ।