एमालेमा होइन, माओवादीमा पहिरो जान आवश्यक : महासचिव पोखरेल

‘नेपालमा धेरै दल होइन, बलिया दलको खाँचो छ’


१६ भाद्र २०८०, शनिबार
shankar pokharel 0scADuIM3V

बुटवल । प्रमुख प्रतिपक्षी नेकपा एमालेका महासचिव शंकर पोखरेलले अहिले मुलुकमा तीन मुख्य चुनौती देखिएको बताएका छन् । बुटवलमा शनिबारदेखि सुरु भएको नेकपा एमाले लुम्बिनी प्रदेशको पहिलो अधिवेशनलाई सम्बोधन गर्दै महासचिव पोखरेलले धेरै दलका कारण आज मुलुक अत्यन्त ठूलो संकटबाट गुज्रिरहेको बताए ।

‘मुलुकमा अहिले तीन प्रकारका चुनौती रहेका छन् । मुलुकमा धेरै दल होइन बलिया दल हुनुपर्ने आवश्यकता रहेको बताउँदै उनले भने, अहिलेको पहिलो चुनौती राजनीतिक अस्थिरता र अराजकता हो’, उनले भने, २०४६ पछि मुलुकले २८ जना प्रधानमन्त्री बेहोरेको छ । तर जबसम्म बलियो सरकार बन्न पाउँदैन तबसम्म जनताको समृद्धिको आकांक्षा पुरा हुन सक्दैन ।’

‘अब यो मुलुकमा धेरै दल होइन बलिया राजनीतिक दलको आवशयक छ । एउटै विचारमा आधारित दलले जनमत विभाजन । जति धेरै राजनीतिक दल त्यति धेरै विचलन, अराजकता र वैदेशिक हस्तक्षेप हुन्छ’, उनले पछिल्लो समय नेपालमा सांस्कृतिक मूल्यहरूको विघटन तीव्र गतिमा हुन थालेको बताए । उनले माओवादी जनयुद्धका नाममा जातजातिका नाममा राज्य बाँड्ने माओवादीले प्रयासलाई एमाले अध्यक्ष केपी शर्मा ओलीको पहलका कारण रोकिएको भन्दै अहिले फेरि मुलुकमा नयाँ ढङ्गले जातीय द्वन्द्व भड्काउने प्रयासमा प्रधानमन्त्री आफै लागेको बताए । उनले भने, ‘एक प्रकारले भन्ने हो भने संविधान सभाका बेलाको जस्तै जातीय द्वन्द्व भड्काउने कुत्सित प्रयास भइरहेको छ ।’

उनले प्रधानमन्त्री प्रचण्डले नेकपा एमालेमा पहिरो जाँदैछ भनेर भ्रम फैलाएको आरोप समेत लगाए । ‘नेकपा एमालेमा होइन अब माओवादीमा पहिरो जान जरुरी छ । देशभक्तहरू आउनुस् एमालेमा, विकास र समृद्धिको चाहना राख्नेहरू आउनुस् एमालेमा’, पोखरेलको आव्हान छ । उनले नेकपा एमालेलाई बलियो बनाउन आफू र उपाध्यक्ष विष्णु पौडेल एक रहेको दाबी समेत गरेका छन् ।

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७