ललिता निवास प्रकरण : पूर्वमन्त्री जोशीको बिगो ६२ करोड घटाउन अदालतमा पत्राचार
काठमाडौं । जिल्ला सरकारी वकिल कार्यालय काठमाडौंले ललिता निवास प्रकरणमा प्रहरीको केन्द्रीय अनुसन्धान ब्युरो (सीआईबी) ले गरेको त्रुटि सच्याउनका लागि जिल्ला अदालत काठमाडौंलाई पत्राचार गरेको छ ।
सीआईबीले नै पत्राचार गरी त्रुटि सच्याइ दिनका लागि आग्रह गरेकोमा सोही बमोजिम जिल्ला अदालतलाई पत्राचार गरिएको सरकारी वकिल कार्यालयले जनाएको छ । यो मुद्दामा सुरुमा प्रतिवादी पूर्वमन्त्री चन्द्रदेव जोशीबाट ६३ करोड १० लाख बीगो रकम दाबी गरिएको थियो ।
अहिले त्यसलाई सच्याएर १ करोड ८ लाख ७९ हजार ८१० रुपैयाँ कायम गरिदिन सरकारी वकिल कार्यालयले जिल्ला अदालतलाई पत्राचार गरेको हो । यससँगै जोशीसँग मागदाबी गरिएको बिगोमा ६२ करोड भन्दा बढीले घट्ने भएको छ । जिल्ला न्यायाधिवक्ता महेश प्रसाद खत्रीले जिल्ला अदालतलाई पत्राचार गर्दै उक्त आग्रह गरेका हुन् ।
