सुन तस्करीका नाइके गोरे भेटिए, सुन अझै भेटिएन
काठमाडौं, ८ जेठ । साढे ३३ किलो सुन तस्करी र भरिया सनम शाक्यको हत्याको विषय चर्को बनेपछि फरार रहेका सुन तस्करीका नाइके चुँडामणि उप्रेती ‘गोरे’ भारतमा लुकेर बसेको अवस्थामा पक्राउ परेका छन् ।
उनलाई प्रहरीको केन्द्रिय अनुसन्धान व्यूरो (सिआइबी) को टोलीले विशेष सूचनाका आधारमा पक्राउ गरी नेपाल ल्याएको हो । चार वर्षमा ३८ क्विन्टल तस्करीको सुन नेपाल भित्र्याउन सफल सफल मोरङ उर्लाबारी घर भएका गोरे समातिए पनि सुन भने अझैसम्म गायव नै रहेको प्रहरीको उच्च स्रोतले जानकारी दिएको छ । गृह मन्त्रालयले गठन गरेको सुन तस्करी छानविन समितिले पक्राउ परेका गोरेलाई आज सार्वजनिक गर्ने भएको छ ।
आज (सोमबार) समितिले पक्राउ परेका गोरेलाई गृह मन्त्रालयमा पत्रकार सम्मेलन गरी सार्वजनिक गर्ने समितिका एक सदस्यले जानकारी दिएको छ । पक्राउका लागि रेडकर्नर नोटिस समेत जारी गरिएका गोरेलाई पक्रिन झण्डै ‘इन्काउन्टर’ गर्नुपर्ने अवस्था सिर्जना भएको समेत प्रहरीको उच्च स्रोतले जानकारी दिएको छ । अहिले साढे ३३ किलो सुन तस्करी र सनम हत्याको मुद्दा मोरङ जिल्ला अदालतमा चलिरहेको छ ।
प्रहरीका उच्च अधिकारीहरुसहित सुन तस्करमा संलग्नहरुमाथि अहिले अनुसन्धानपछि थप प्रमाणसहित कार्वाहीको प्रक्रिया चलिरहेको छ । सुन तस्करी काण्डमा ६३ जना पक्राउ परिसकेका छन् । सनम शाक्यलाई सुन हराएको भन्दै यातना दिने गोरे नै भएको अदालतमा प्राप्त भिडियोहरुले प्रमाणित गरिसकेको छ । सनमको हत्यापछि गोरे फरार रहेका थिए । गोरे पक्राउ परेपछि सुन तस्करीको अन्य जालो र रहस्य पनि खुल्दै जाने पक्का छ । गोरेबाट सुन बरामद नभए तस्करीको मुद्दा कमजोर बन्न सक्ने समेत कानून व्यवसायीहरु बताउँछन् । सुन तस्करी र सनम शाक्यको हत्या अभियोगमा गोरेसहित अन्य सबै जेल जान सक्ने प्रहरीले जनाएको छ ।