आइसीसी विश्वकप : बंगलादेशले अफगानिस्तानलाई ६ विकेटले हरायो
काठमाडौँ । आईसीसी एकदिवसीय विश्वकप क्रिकेटमा बंगलादेशले अफगानिस्तानलाई ६ विकेटले पराजित गरेको छ । भारतको धर्मशालामा अफगानिस्तानले दिएको १५७ रनको सामान्य लक्ष्य बंगलादेशले ३४ ओभर ४ बलमा ४ विकेट गुमाएर भेटायो ।
बंगलादेशको जितमा नजमुल होसाइन शान्तोले नटआउट ५९ र मेहदी हसन मिराजले ५७ रन बनाए । अफगानिस्तानका फैजल हक फारुकी, नवीन उलहक र अजमतुल्लाह ओमरजाईले एक-एक विकेट लिए । त्यसअघि टस हारेर पहिले ब्याटिङको निम्तो पाएको अफागानिस्तान ३७ ओभर २ बलमा १५६ रनमा अलआउट भयो ।
उसका लागि रहमानुल्लाह गुरबाजले सर्वाधिक ४७ रन बनाए । यस्तै अजमतुल्लाह ओमरजाई र इब्राहिम जद्रानले समान २२-२२ रन बनाए । बंगलादेशका शकिब अल हसन र मेहदी हसन मिराजले ३-३ विकेट लिए ।
