मर्यादा भुलेर सुब्बाको कोटामा सचिव श्रीधर सापकोटा विदेश भ्रमणमा
काठमाडौं : ऐनद्वारा निर्धारित दायित्व पूरा नगर्ने मन्त्रालयका सचिव विदेश जान पाउँदा सुब्बा वा बढीमा शाखा अधिकृतको भूमिकामा पनि फाल हाल्दा रहेछन् । स्वदेशमा रहँदा सहायक स्तरका कर्मचारीलाई मान्छे नै नगन्ने मन्त्रालयका सचिव सुब्बाकै हैसियतमा विदेसिएका हुन् ।
यसरी आफूभन्दा कम्तीमा पनि दुई तह कनिष्ठ कर्मचारीको भूमिका हुने ठाउँमा मन्त्रिपरिषद्बाट समेत पछि स्वीकृत हुनेगरी खुसुक्क बिदेसिने रक्षा मन्त्रालयका सचिव श्रीधर सापकोटा हुन् । अझ उदेकलाग्दो कुरा त यो छ कि कानुनका सचिव श्रीधर अवकाश हुन ४ दिन मात्र बाँकी रहँदा सुब्बा गए हुने काममा मन्त्रिपरिषद्को पूर्व स्वीकृति लिएर मात्र बिदेसिनुपर्ने प्रावधानका विपरीत जापानमा कात्तिक ५ देखि ११ गतेसम्म हुने प्रि सिपमेण्ट इन्स्पेक्सन भिजिटमा सहभागी हुन गएका हुन् ।
नेपाली सेनाको सम्भाररथी विभागका कार्यरत एक अधिकृतका अनुसार प्रि सिपमेण्ट निरीक्षण भिजिट भनेको जहाजमा सामान राख्नुअघि गरिने चेकजाँचको काम हो । यस्ता कार्यमा प्रायः सुब्बा र बढीमा शाखा अधिकृतसम्म जानु मर्यादित र पदीय जिम्मेवारीअनुसार हुने पनि रक्षा मन्त्रालयका एक पूर्वसचिवले बताए ।
जापानको आवाजु प्लाण्ट, इसिकावा प्रिफेक्चर, कोमात्सु सिटीमा हुने सो इन्स्पेक्सन भिजिटमा जानुअघि श्रीधरले निमित्तको कामकाज गर्न सहसचिव शंकर प्रसाद पाठकलाई जिम्मेवारी सुम्पिएका छन् । उनको जापान भ्रमणलाई सोमबारको क्याबिनेट बैठकले समर्थन गरेको छ ।
-जनआस्था साप्ताहिकबाट