आर्सनललाई पछि पार्दै लिभरपुल शीर्षस्थानमा, सलाहको २०० गोल पुरा
काठमाडौँ । इङ्लिस प्रिमियर लिग फुटबलमा आर्सनललाई पछि पार्दै लिभरपुल शीर्ष स्थानमा उक्लिएको छ । गए रातिको खेलमा लिभरपुलले क्रिस्टल प्यालेसलाई २–१ गोल अन्तरले हरायो । जितसँगै ३७ अङ्क जोडेको लिभरपुल अङ्क तालिकाको शीर्ष स्थानमा उक्लिएको हो ।
मोहमद सलाहले खेलको ७६औं मिनेटमा र हार्वे इलियटले दोस्रो हाफको इन्जुरी समयमा गोल गर्दै लिभरपुललाई जिताए । सलाह लिभरपुलका लागि २ सय गोल पुरा गर्ने पाँचौँ खेलाडी पनि बनेका छन् ।
क्रिस्टल प्यालेसले खेलमा शुरुवाती अग्रता लिए पनि त्यसलाई जोगाउन सकेन । जोर्डन अय्युले दोहोरो पहेंलो कार्ड खाँदै मैदान छाडेपछि क्रिस्टल प्यालेस ७५औँ मिनेटमा १० खेलाडीमा सीमित बनेको थियो ।
