जनमत पार्टी मधेस सरकारबाट बाहिरियो, समर्थन पनि फिर्ता
![](https://www.nayapage.com/wp-content/uploads/2024/01/janamat.jpg)
काठमाडौँ । डा. चन्द्रकान्त राउत ‘सीके’ नेतृत्वको जनमत पार्टी मधेस सरकारबाट बाहिरिएको छ । जनमत पार्टीका दुई जना मन्त्रीले मंगलबार मुख्यमन्त्री सरोज यादवलाई आफ्नो राजीनामा बुझाएका छन् । सरकारबाट बाहिरिने निर्णयसँगै जनमतले गठबन्धन सरकारलाई दिएको समर्थन पनि फिर्ता लिएको छ ।
‘मधेस सरकारलाई दिएको समर्थन फिर्ता लिएर बाहिरिने निर्णय गरेका छौं,’ सांसद चन्दन सिंहले भने । पार्टीका संसदीय दलका नेता तथा मन्त्री महेश प्रसाद यादवले सरकारलाई दिएको समर्थन पनि फिर्ता लिने निर्णय भएको बताए । ‘मसहित मधेस सरकारमा रहेका मन्त्रीलाई फिर्ता बोलाउने निर्णय भएको छ । केही बेरमा राजीनामा बुझाउँदै छौं,’ उनले भने, ‘नेपालको संविधानको धारा १६८ अनुसार जनमत पार्टीको समर्थन रहेकोमा आजैको मितिबाट सरकारलाई दिएको समर्थन पनि फिर्ता लिन्छौं ।’
![](https://www.nayapage.com/wp-content/uploads/2024/01/janamat-768x514.jpg)
पछिल्लो समय सत्ता गठबन्धनसँग जनमत असन्तुष्ट बन्दै गएको छ । राष्ट्रियसभा चुनावका लागि उम्मेदवारी बाँडफाँटदेखि नै जनमत असन्तुष्ट छ । मधेसमा जनमत र जसपाबीच तिक्तता बढ्दै गएको छ । हिजोमात्र सप्तरीमा मधेस कृषि विद्यालयको शिलान्यास कार्यक्रममा अध्यक्ष उपेन्द्र यादव प्रमुख अतिथि हुँदा जनमतले विरोध जनाएको थियो। सोही क्रममा मन्त्रीसहित ३ जना सांसद घाइते भएका थिए भने दजनौं कार्यकर्ता घाइते भएका थिए ।