राक्सिराङकाे एउटै गाउँका १३० जनामा भाइरल ज्वरो, एकको मृत्यु
काठमाडौँ । मकवानपुरको राक्सिराङ गाउँपालिकाको एउटै गाउँका १३० जनामा भाइरल ज्वरोको संक्रमण देखिएको छ । राक्सिराङ गाउँपालिका–९ टर्लिङमा एक हप्तायता भाइरल ज्वरो फैलिएको हो । ज्वरोकै कारण एक जनाको निधन भएको गाउँपालिकाका स्वास्थ्य शाखा प्रमुख विजयकुमार काप्रीले जानकारी दिएका छन् ।
‘राक्सिराङ गाउँपालिका–९ का धेरै जनामा भाइरल ज्वरोका बिरामी भेटिएका छन् । अहिलेसम्म १३० जना बिरामी छन्,’ उनले भने, ‘ज्वरोकै कारण एक जनाको निधन भइसकेको छ ।’ उनका अनुसार सोही गाउँका ५५ वर्षका टीकाबहादुर नगरकोटीको निधन भएको हो । उनको उपचारको क्रममा निधन भएको थियो ।
भाइरल ज्वरो फैलिएको ठाउँमा चेपाङ र नगरकोटी जातिको बाक्लो बसोवास छ । बिरामी हुनेमा बालबालिकादेखि सबै उमेर समूहका छन् । बिरामीमा ज्वरो आउने, वाकवाकी लाग्ने, रुघाखोकी तथा छाती दुःख्ने लक्षण देखिएको काप्रीको भनाइ छ । मौसम परिवर्तनसँगै खानपानका कारण ज्वरो फैलिएको अनुमान छ । गाउँपालिकाले प्रकोपकै रुपमा भाइरल ज्वरोका बिरामी बढेपछि स्वास्थ्य शिविर नै सञ्चालन गरिसकेको छ । ‘पहिलो चरणमा हेल्थ क्याम्प नै गरिसकियो,’ उनले सुनाए, ‘भोलि (बुधबार) फेरि चिकित्सकसहितको स्वास्थ्यकर्मीको टोली लिएर जाँदैछौँ । अवस्था सुधार हुँदैछ ।’
