भ्रष्टाचारका फाइल खोल्नु भनेको आफ्नो मान्छे चोख्याउनु मात्र रहेछ : रवि लामिछाने
काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्ना वरिपरिका मान्छेलाई जोगाउने र निर्दोषलाई फसाउने खेलमा सरकार संलग्न रहेको आरोप लगाएका छन् । उनले बालकुमारी घटनामा दोषी ठहर भएका मन्त्री प्रकाश ज्वालालाई बर्खास्त गर्न चुनौती समेत दिए ।
आज (आइतबार) प्रतिनिधिसभाको बैठकमा बोेल्दै लामिछानेले भ्रष्टाचारका फाइल खोल्ने भनेको सरकारले आफ्ना र गठबन्धनका मान्छे जोगाउनका लागि मात्र रहेछ भन्ने पुष्टि भइसकेको आरोप लगाए । उनले अब फाइल रास्वपाका मान्छेको मात्र खोल्न भन्दै सरकारलई व्यंग्य गरे ।
सभापति लामिछानेले आफ्ना मान्छे चोख्याउनका लागि सरकारले फाइल खोल्छ र आफ्ना मान्छेलाई चोख्याउँछ भन्ने कुरा ललिता निवास, भुटानी शरणार्थी प्रकरणलगायतमा पुष्टि भइसकेको भन्दै निर्दोष व्यक्तिविरुद्ध उजुरी मागेर फसाउने गरेको जिकिर गरे । उनले सरकारी आयोगले दोषी ठहर गरेका मन्त्रीलाई के गर्ने हो ? भनेर प्रधानमन्त्रीले जवाफ दिनुपर्ने बताए ।
