एमालेसहितको नयाँ गठबन्धन बन्न लागेपछि देउवाले बोलाए पदाधिकारी बैठक
काठमाडौं । नेपाली कांग्रेसले पछिल्लो राजनीतिक अवस्थाबारे छलफल गर्न पदाधिकारी बैठक बोलाएको छ । माओवादी केन्द्रसँगको गठबन्ध टुट्ने संघारमा पुगेका बेलामा कांग्रेस सभापति शेरबहादुर देउवाले थप छलफल गर्न पदाधिकारी बैठक बोलाएका हुन् ।
बैठक बिहान १० बजेका लागि देउवा निवास बुढानिलकण्ठमा बोलाइएको छ । सोमबार बिहान १० बजेका लागि सभापति शेरबहादुर देउवाले पार्टीको पदाधिकारी र पूर्व पदाधिकारीको बैठक बोलाएका नेता जीवन परियारले जानकारी दिएका छन् ।
यसअघि आजै बिहान कांग्रेसका सभापति देउवा र उपसभापति समेत रहेका उपप्रधान तथा रक्षामन्त्री पूर्णबहादुर खड्काले बालुवाटार पुगेर प्रधानमन्त्री प्रचण्डसँग छलफल गरेका थिए । नेकपा एमाले, माओवादी केन्द्र, राष्ट्रिय स्वतन्त्र पार्टी र जनता समाजवादी पार्टीबीच गए राति सत्ता सहयात्राका विषयमा नयाँ समझदारी बनेपछि वर्तमान सत्ता गठबन्धनको प्रमुख घटक कांग्रेस झस्किएको छ ।