बिजुलीको तार चुँडिएर आँगनमा खस्दा हजुरआमा र नातिको करेण्ट लागेर मृत्यु, एक गम्भीर
दाङ । दाङमा करेण्ट लागेर दुई जनाको ज्यान गएको छ भने एक जना गम्भीर घाइते भएका छन् । राप्ती गाउँपालिका–३ मसुरियास्थित विद्युतको तार चुँडिएर करेण्ट लाग्दा एकै घरका दुई जनाको मृत्यु भएको र एक जना गम्भीर घाइते भएको इलाका प्रहरी कार्यालय भालुबाङले जनाएको छ ।
स्थानीय ५५ वर्षीय दिलसरा केसी र उनका ४ वर्षीय नाति कृष्ण केसीको मृत्यु भएको इलाका प्रहरी कार्यालय भालुबाङका प्रमुख उज्जलबहादुर सिंहले जानकारी दिए । हजुरआमा र नाति घरको आँगनमा उभिएको अवस्थामा करेण्ट लागेर मृत्यु भएको प्रहरीले जनाएको छ ।
करेण्ट लाग्दा ६० वर्षीय गोरखबहादुर केसी गम्भीर घाइते भएका र उनलाई उपचारका लागि बुटवल लगिएको छ । एक्कासी बिजुली तार चुँडिएर घरको आँगनमा पुग्दा करेण्ट लागेको थियो । नेपाल विद्युत प्राधिकरणको हाइटेन्सन लाइनको तार चुडिएर करेण्ट लागेको बताइएको छ ।
