वैदेशिक रोजगार विभागका लेखापाल निरौलाविरुद्ध भ्रष्टाचार मुद्दा
काठमाडौं । वैदेशिक रोजगार विभाग ताहाचाल, काठमाडौंमा कार्यरत लेखापाल प्रमोद निरौलाविरुद्ध भ्रष्टाचार मुद्दा दायर भएको छ । अख्तियार दुरूपयोग अनुसन्धान आयोगले लेखापाल निरौलाविरुद्ध आज विशेष अदालत काठमाडौंमा मुद्दा दायर गरेको हो ।
आयोगका प्रवक्ता नरहरि घिमिरेले धरौटी रकम फिर्ता गर्ने प्रयोजनका लागि सेवाग्राहीसँग १५ हजार रुपैयाँ घुस लिएको पुष्टि हुन आएकाले लेखापाल निरौलाविरुद्ध भ्रष्टाचार मुद्दा दायर गरेको जानकारी दिए । उनीविरुद्ध १५ हजार विगो र जरिवाना माग गरिएको अख्तियारले जनाएको छ । निरौलालाई अख्तियारको टोलीले फागुन २९ गते १५ हजार घुस रकम र स्रोत नखुलेको ७१ हजार ६२० रुपैयाँसहित उनकै कार्यकक्षाबाट नियन्त्रणमा लिएको थियो ।
