टिकटकबारे अमेरिकाले ल्यायो नयाँ कानुन : शेयर बेच्नेकी प्रतिबन्ध झेल्ने !
काठमाडौं । अमेरिकामा टिकटकबारे नयाँ कानुन जारी भएको छ । राष्ट्रपति जो बाइडेनले संसदको दुवै सदनले पारित गरेको एक कानुनमा हस्ताक्षर गरेसँगै टिकटक सम्बन्धी नयाँ कानुन लागु भएको छ ।
अब टिकटकको मूल कम्पनी बाइट डान्सलाई अमेरिकामा आफ्नो कम्पनीको शेयर बेच्न करिब एक वर्षको समय पाउने छ । सो समयभित्र टिकटकको स्वामित्व चिनियाँ लगानीकर्ताबाट अमेरिकी लगानीकर्तामा नसारेमा अमेरिकामा टिकटक प्रतिबन्ध हुनेछ ।
यता टिकटकले भने अमेरिकी नयाँ कानुनलाई चुनौती दिने बताएको छ । अमेरिकाले टिकटकले चिनियाँ सरकारसँग प्रयोगकर्ताको डाटा सेयर गरिरहेको हुन सक्ने चिन्ताका कारण यो कानुन ल्याइएको हो । तर, चिनियाँ कम्पनीले यो दाबीलाई सधैँ अस्वीकार गर्दै आएको छ । टिकटकका विश्वमै सबैभन्दा बढी प्रयोगकर्ता अमेरिकामा रहेका छन् । अमेरिकामा १७० मिलियन भन्दा बढीले टिकटकको प्रयोग गरिरहेका छन् ।
