उमेशराज जोशी र भीम ढकाल एआईजीमा बढुवा
काठमाडौं । सरकारले दुई डिआईजीको बढुवा गर्ने निर्णय गरेको छ । आज (बिहीबार) बसेको मन्त्रिपरिषद् बैठकले डिआईजी उमेशराज जोशी र भीम ढकाललाई एआईजीमा बढुवा तथा पदास्थापन गर्ने निर्णय गरेको सञ्चार तथा सूचना प्रविधिमन्त्री रेखा शर्माले जानकारी दिइन् ।
गृह मन्त्रालयको प्रस्तावमा जोशी र ढकाललाई बढुवा गर्ने निर्णय भएको उनले बताइन् । यसअघि बढुवा समितिले ३ वैशाखमा जोशी र ढकाललाई एआईजी बढुवाका लागि सिफारिस गरेको थियो । यस बीचमा प्रहरी महानिरीक्षक वसन्तबहादुर कुँवर इन्टरपोलको महासभामा भाग लिन फ्रान्स गएको भन्दै बढुवा रोकिएको थियो ।
