‘टीओआर’ टुंगो लगाउन बसेको कार्यदलको बैठक निष्कर्षविहीन
काठमाडौं । सहकारी ठगीको विषयमा छानबिन समितिको ‘टीओआर’ बनाउन गठित कार्यदलको वैठक आज (बिहीबार) पनि निष्कर्षविहिन भएको छ । बिहीबार अपराह्न सिंहदरबारस्थित कानुन मन्त्रालयमा बसेको कार्यदलको बैठक निष्कर्षविहीन भएको कार्यदलका सदस्य महेश बर्तौलाले जानकारी दिए ।
कार्यदलको बैठकमा सहमति जुटाउने गरी अधिकतम प्रयास गरिएको भए पनि सहमति हुन नसकेको उनले बताए । कार्यदलका सदस्य समेत रहेका नेकपा एमालेका प्रमुख सचेतक महेश बर्तौलाका अनुसार, टीओआरबाट थप छलफलका लागि शुक्रबार बिहान साढे ८ बजे पुनः बस्नेगरी आजको बैठक सकिएको हो ।
‘त्यति धेरै नकारात्मक भएन, कांग्रेस अलिकति लचक भएको जस्तो देखिँदैछ,’ उनले सुनाए, ‘तर अहिले नै सहमति भनेको भएको छैन ।’ यसअघि गत मंगलबार बसेको बैठक पनि निष्कर्षविहीन बनेको थियो ।