सांसदहरुलाई प्रधानमन्त्रीको आग्रह, ‘बजेटमा असन्तुष्टि भए संसदमा हैन् पार्टी नेतृत्वमा राख्नुहोस्’
काठमाडौँ, २ असार । प्रधानमन्त्री एवं नेपाल कम्युनिष्ट पार्टीका अध्यक्ष केपी शर्मा ओलीले सरकारी बजेट प्रतिको असन्तुष्टि पार्टी नेतृत्वमा राख्न निर्देशन दिएका छन् । संघीय सांसदमा आफनै सांसदहरु बजेटको चर्को विराधपछि प्रधाननमन्त्री निवास बालुवाटारमा बसेको नेकपाको संसदीय दलको बैठकमा संसदीय दलका नेता तथा अध्यक्ष ओलीले बजेटको मर्म बुझेर प्रस्तुत हुन निर्देशन दिएका हुन् ।
उनले राष्ट्रको ढुकुटी बलियो नभएको अवस्थामा बजेट ल्याइएकाले बताउँदै त्यस मर्मलाई बुझेर प्रस्तुत हुन पार्टीका सांसदलाई निर्देशन दिए । सबै क्षेत्रका जनता र प्रतिनिधिका सबै आवश्यकता र चाहना बजेटले समेट्न नसके पनि समृद्धिको आधार तयार गर्न सरकारको बजेट सकारात्मक रहेको बताउँदै असन्तुष्टि भएमा संसद्मा नभई पार्टीमा आग्रह गरे ।
प्रतिनिधिसभाका बैठकमा बजेटमाथिको छलफलका क्रममा कतिपय सत्तारुढ दलकै सांसदले बजेटको आलोचना गरेपछि अध्यक्ष ओलीले सो आग्रह गरे हो । ‘तपाईहरुका असन्तुष्टि र भनाइ जायज हुन सक्छन, मेरै निर्वाचन क्षेत्रमा पनि के के प¥यो, परेन मैले सोचेजस्तो नभएको हुनसक्छ । अघिल्लो सरकारले अर्थतन्त्रलाई असन्तुलित बनाई दायित्व छाडेर गएकाले हामीलाई समस्या परेको हो । हामी यसलाई सही बाटोमा ल्याउने प्रयासमा छौँ ।’ उनले भने ।
उनले भाडामा पर्याप्त खाना नभएपछि केटाकेटीलाई जन्ते बाख्र्रो बाँड्दा कसैलाई झोल र कसैलाई टुक्रामात्र परे झैँ भान्छेलाई बाँड्न गाह्रो हुने प्रसंग उल्लेख गर्दै सरकारका काम र बजेटका असन्तुष्टि राख्न पार्टीका सांसदले नेतृत्वलाई भन्नु उपयुक्त हुने बताए ।
अध्यक्ष पुष्पकमल दाहाल प्रचण्ड र वरिष्ठ नेतासहित सहभागी बैठकमा करीब ५० सांसदले बोल्नका लागि नाम टिपाएको बुझिएको छ । बैठकमा दलको नियमावली संशोधनबारे पनि छलफल हुनेछ ।
यसैबीच, संसदीय दलको बैठकपछि आजै नेकपाको सचिवालय र स्थायी कमिटीको बैठक बस्नेछ ।