माथिल्लो तामाकोशीको आईपीओ असार २४ मा, १२ गते आह्वानपत्र सार्वजनिक हुने
काठमाडौं, ८ असार । निर्माणाधीन ४५६ मेगावाट क्षमताको माथिल्लो तामाकोशी जलविद्युत आयोजनाको साधारण शेयर (आईपीओ) को प्रतिक्षाको घडी अब समाप्त भएको छ । आउँदो असार २४ गते आइतबारदेखि माथिल्लो तामाकोशीको आईपीओका लागि आवेदन खुला हुने भएको हो ।
प्रवद्र्धक अपर तामाकोशी हाइड्रोपावर लिमिटेडले २४ गतेदेखि आईपीओको निष्कासन खुला गर्न १२ गते आब्हानपत्र सार्वजनिक गर्नेछ । कम्पनी रजिष्टारको कार्यलयले विवरणपत्र स्वीकृत गरेकाले २४ गते निष्कासन हुन लागेको हो । अपर तामाकोशी र बिक्री प्रवन्धक नागरिक लगानी कोषबीच शुक्रबार भएको बैठकले असार २४ सम्म आईपीओ निष्कासन गर्ने निर्णय गरेको कोषका शेयर शाखा प्रमुख रोशनजंग कार्कीले बताए । आयोजना प्रभावित स्थानीयबासिन्दा र सर्वसाधारणलाई एउटै आब्हापत्र आउने उनले जानकारी दिए ।
पहिलो चरणमा आयोजना प्रभावित स्थानीयबासिन्दालाई १० प्रतिशत अर्थात १ अर्ब ५ करोड ९० लाख रुपैयाँ बराबरको १ करोड ५ लाख ९० हजार कित्ता आईपीओ निष्कासन हुनेछ । पहिलो चरणको बाँडफाँडपछि दोस्रो चरणको निष्कासन हुने कार्कीले बताए । स्थानीयबासिन्दालाई १५ दिनको म्याद दिएर आईपीओ आउने छ । सर्वसाधारणलाई १५ प्रतिशत अर्थात १ अर्ब ५८ करोड ८५ लाख रुपैयाँ बराबरको १ करोड ५८ लाख ८५ हजार कित्ता आईपीओ निष्कासन गर्न लागेको हो ।
स्थानीय र सर्वसाधारण गरी माथिल्लो तामाकोसीले २ अर्ब ६४ करोड ७५ लाख रुपैयाँ बराबरको २ करोड ६४ लाख ७५ हजार कित्ता आईपीओ निष्कासन गर्नेछ । यसअघि कर्मचारी संचय कोषका संचयकर्ता, ऋण दिने संस्थाका कर्मचारी र नेपाल विद्युत प्राधिकरणका कर्मचारीलाई गरी १७.२८ प्रतिशत अर्थात १ अर्ब ८२ करोड ९९ लाख ५२ हजार रुपैयाँ बराबरको १ करोड ८२ लाख ९५ हजार कित्ता सेयर निष्कासन गरी ०७२ जेठ २९ गते बाँडफाँड भइसकेको छ । तामाकोशीमा कर्मचारी संचय कोष, नेपाल विद्युत प्राधिकरण, राष्ट्रिय बीमा संस्थान र नागरिक लगानी कोषको लगानी छ । ४५६ मेगावाटको सो आयोजना १ वर्षमा सम्पन्न गर्ने लक्ष्य लिइएको छ । आयोजनाको ९६ प्रतिशत काम सकिएको छ ।
