मेस्सीको गोलले म्याराडोना बिरामी
काठमाडौं, १३ असार । मेस्सीको गोलले म्याराडोना विराम शीर्षकले तपाईलाई पक्कै पनि उत्सुकता जगाउन सक्छ । वास्तवमा मेस्सीले गोल गर्दा कसरी म्याराडोना बिरामी हुन्छन् ? यो सब वाहियात जस्तो पनि लाग्न सक्छ । तर, वास्तविकता यहि हो । गए राति भएको अर्जेन्टिना र नाइजेरियाबीचको विश्वकप प्रतिष्पर्धा अर्जेन्टिनाले जीत हात पारेपछि म्याराडोना बिरामी नै परेका छन् ।
अर्जेन्टिनी कप्तान मेस्सीले गोल गरेको खुशीयालीमा बढी रोमाञ्चक बनेका कारण म्याराडोनाको स्वास्थ्यमा समस्या देखिएको हो । चिकित्सकहरुले हाँस्नु स्वास्थ्यका लागि फाइदाजनक भन्ने गरे पनि बढी हाँसेको र मेस्सीको सफलतामा बढी रोमाञ्चक बनेका कारण म्याराडोना बिरामी परेको विदेशी सञ्चारमाध्यमले जनाएका छन् । विश्वकप फुटबल अन्तर्गत मंगलबार राति भएको अर्जेन्टिना र नाइजेरियाबिचको निर्णायक खेलमा खुशी मनाउने क्रममा म्यारोडोना बिरामी परेका हुन् ।
मैदानमा खेलाडीको प्रदर्शनबाट थपिएको उत्साह र विपक्षीको गोलबाट थपिएको निरासालाई लिएर विशिष्टका लागि छुट्याइएको रङ्गशालाको एक छेउमा रमाइरहेका म्यारोडोना बिरामी परेको खबर इएसपिएनले जनाएको छ । खेलको शुरुवाती १४ औं मिनेटमा आफूलाई मनपर्ने मेस्सीले गोल गर्दा उनी निकै उफ्रिए, सायद मेस्सी भन्दा धेरै खुशी म्याराडोना थिए । जब ५१ औँ मिनेटमा नाइजेरियाले पेनाल्टीमा गोल गर्यो, त्यो बेला म्याराडोनाको अनुहारमा फेरि निरासा छायो ।
त्यसपछि बराबरीको दिशामा गएको खेलको ८६ औँ मिनेटमा मार्कस रोजोले गोल गरेपछि म्याराडोनाको अनुहारमा भरपुर उत्साह छायो । छेउछाउमा रहेका उनका सहयोगीसँग अंकमाल गरे, खुशीले उफ्रिए र रमाए । म्याराडोनालाई त्यो गोलको उत्साहले यसरी छोयो कि उनलाई चिकित्सा सहायकले त्यहीं प्राथमिक उपचार गर्नु पर्यो । उनको रक्तचाप न्यून भएको रहेछ । मुलुकलाई विश्वकपको उपाधि जिताइसकेका ५७ वर्षीय म्याराडोनालाई सेन्ट पिटर्सबर्गमा रहेको अस्पतालमा लगिएको थियो । केही समय अस्पतालमा बिताएर उनी फर्किएका छन् । एजेन्सीको सहयोगमा
