सरकारले प्रदेश प्रमुखलाई हटाएको छैन : प्रधानमन्त्रीका प्रमुख सल्लाहकार रिमाल
काठमाडौं, २१ असार । प्रधानमन्त्री केपी शर्मा ओलीमा प्रमुख सल्लाहकार विष्णु रिमालले मन्त्रिपरिषदले सातै प्रदेशका प्रमुखलाई हटाएको भनि प्रकाशित समाचार गलत भएको बताएका छन् ।
उनले अहिलेसम्म सरकारले प्रदेश प्रमुख हटाउनेसम्बन्धी कुनै पनि निर्णय नगरेको स्पष्ट पारेका छन् । रिमालले भदौ ४ पछि भएका अन्य राजनीतिक नियुक्तिहरु मात्र खारेज भएको जानकारी दिएका छन् । यसअघि कानुनमन्त्री शेरबहादुर तामाङले बुधबार राति बसेको मन्त्रिपरिषद् बैठकले देउवा सरकारले गरेका अन्य राजनीतिक नियुक्तिसँगै प्रदेश प्रमुखहरु पनि हटाउने निर्णय गरेको जानकारी दिएका थिएका थिए ।
‘कानुन मन्त्री ज्यू झुक्किनु भएको रहेछ, प्रदेश प्रमुखहरुलाई हटाउने निर्णय भएको छैन’, रिमालले भने । बुधबार साँझ बसेको मन्त्रिपरिषद्को बैठकले प्रदेश तथा प्रतिनिधिसभाका लागि निर्वाचन आचारसंहिता लागू भएदेखि नयाँ सरकार गठन हुनुभन्दा पहिले मन्त्रिपरिषद् तथा मन्त्रीस्तरबाट भएका सबै नियुक्ति खारेज गर्ने निर्णय गरेको थियो ।
तत्कालीन देउवा सरकारले प्रदेश १ मा गोविन्द सुब्बा, २ मा रत्नेश्वरलाल कायस्थ, ३ मा अनुराधा कोइराला, ४ मा बाबुराम कुँवर, ५ मा उमाकान्त झा, ६ मा दुर्गाकेशर खनाल र ७ मा मोहनराज मल्ललाई प्रदेश प्रमुखका रुपमा सिफारिस गरेको थियो । नियुक्त गरिएका प्रदेश २ का कायस्थ र प्रदेश ५ का झाबाहेक बाँकी सबै कांग्रेस निकट हुन् ।
