डा.केसीलाई प्रधानमन्त्रीको प्रस्ताव,‘स्वास्थ्य शिक्षा अनुगमन संयन्त्रको नेतृत्व गर्नुुहोस्’
काठमाडौँ, २६ साउन । चिकित्सा शिक्षा सुधारका लागि पटक–पटक अनसन बसेका डा. गोविन्द केसी शनिबार प्रधानमन्त्री केपी शर्मा ओलीलाई भेट्न प्रधानमन्त्री निवास वालुुवाटार पुगे ।
प्रधानमन्त्री केपी शर्मा ओलीसंग छलफल गर्दै त्रिभुवन विश्वविद्यालय शिक्षण अस्पतालका प्राडा गोविन्द केसी । तस्वीर : प्रधानमन्त्रीको सचिवालय
डा. केसीले आफ्ना माग पूरा गर्न पहलकदमी लिएकामा धन्यवाद दिन भन्दै प्रधानमन्त्री निवास पुगेका उनलाई प्रधानमन्त्रीवले समग्र स्वास्थ्य क्षेत्रका समस्या समाधान गर्न गठन गरिने स्वास्थ्य शिक्षा अनुगमन संयन्त्रको नेतृत्व गर्न प्रस्ताव गरे ।
प्रधानमन्त्री ओलीले स्वास्थ्य क्षेत्रको सुधारका लागि मागको सीमामा मात्रै अल्झिनु पर्छ भन्ने पक्षमा आफू नभएको बताउँदै नेतृत्व लिएर काम गर्न आग्रह नै गरे ।
‘म प्रधानमन्त्री भएका बेला तपाईं अनशन नै बस्नुपर्ने थिएन । माग पूरा गराउन अरु धेरै विकल्प थिए र छन् ।’ प्रधानमन्त्रीले भने,‘जनताको स्वास्थ्य सेवासँग गासिएका विषयमा तपाईंसँग सरकारको कुनै विमति थिएन । स्वास्थ्य शिक्षाको क्षेत्रमा सुधार गर्न र यसमा भएका विकृति अन्त्य गर्न एउटा बलियो संयन्त्र बनाउँ, त्यसको कमाण्ड तपाई सम्हाल्नुस । ’
प्रधानमन्त्रीले संयन्त्रलाई सरकारले पछाडी बसेर सहयोग गर्ने बताउँदै भने,‘दुर्गमका जनतामा स्वास्थ्य सेवा पु¥याउन अवरोध गर्ने विरुद्ध डण्डा चलाउने संयन्त्रको नेतृत्व तपाईं नै गर्नुस, तपाईंको पछाडि बसेर सरकारले सहयोग गर्छ ।’
तर डा. केसीले प्रधानमन्त्रीको प्रस्ताव सकारात्मक भए पनि आफू त्यस्तो प्रशासनिक जिम्मेवारीमा नरहने र त्यसका लागि कैयौँ योग्य चिकित्सक र प्रशासक रहेको बताए । ‘म त्यस्तो संयन्त्रमा बस्दिन, बाहिरै बसेर काम गर्छु, अन्य योग्य व्यक्ति धेरै हुनुहुन्छ’, केसीले भने ।
प्रधानमन्त्री ओलीले आफ्नो संकल्प देश बनाउने भएको र जनताको स्वास्थ्य तथा शिक्षामाथि आफ्नो संकल्प र प्रतिबद्धता कमजोर नरहेको बताए । प्रधानमन्त्रीले स्वास्थ्य क्षेत्रमा सुधार गर्न केसीसँग भएका सम्झौतामा मात्रै सीमित रहनुपर्छ भन्ने आफूलाई नलागेको र त्यसबारे खुला भएर काम गर्न तयार रहेको बताए ।
प्रधानमन्त्री केपी शर्मा ओलीसंग छलफल गर्दै त्रिभुवन विश्वविद्यालय शिक्षण अस्पतालका प्राडा गोविन्द केसी । तस्वीर : प्रधानमन्त्रीको सचिवालय
उनले ‘जनतालाई कसरी सुलभ स्वास्थ्य सेवा दिन सकिन्छ, कसरी सबैलाई स्वास्थ्य सेवाको पहुँचमा पु¥याउन सकिन्छ भन्ने कुरामा तपाईंसँग भएका सम्झौताको सीमामा मात्रै बस्नुपर्छ भन्ने छैन;, प्रधानमन्त्रीले भने,‘सरकार त्योभन्दा फराकिलो भएर जान चाहन्छ ।’
प्रधानमन्त्रीले कुनै निजी मेडिकल कलेजसँग गासेर आफूलाई नहेर्न केसीलाई आग्रह गर्नुभयो । ‘तपाईहरुलाई के भ्रम नहोस् भने, फलानो कलेजलाई सम्बन्धन दिनु वा नदिनुसँग मेरो कुनै लिनुदिनु छैन’, प्रधानमन्त्रीले भने, ‘चिकित्सा शिक्षाको क्षेत्रमा सुधार गर्ने कुरामा म प्रतिबद्ध छु ।
