विश्वविद्यालयले संख्यामा भन्दा पनि गुणस्तरमा ध्यान दिनुपर्छ : प्रधानमन्त्री
काठमाडौं १० भदौ । प्रधानमन्त्री केपी शर्मा ओलीले विश्वविद्यालयहरुले संख्यामा भन्दा पनि गुणस्तरमा ध्यान दिनु पर्ने बताएका छन् ।
मध्यपश्चिमाञ्चल विश्वविद्यालय सुर्खेतको आठौं साधारणसभालाई आइतबार बालुवाटारमा सम्बोधन गर्दै प्रधानमन्त्री ओलीले सो कुरा बताएको हो ।
सरकारले देशलाई आवश्यक पर्ने जन शक्तिको पहिचान गरी त्यसै अनुसारको विद्यालय र कलेजहरु खोल्ने तयारी गरेको प्रधानमन्त्री ओलीको भनाइ छ ।
‘विश्वविद्यालयहरुलाई प्राज्ञिक थलोको रुपमा विकास गर्नु पर्दछ’ प्रधानमन्त्री ओलीले भने,‘त्यहाँ पठनपाठनलाई भन्दा बढी देशलाई आवश्यक पर्ने अध्ययन अनुसन्धान हुन जरुरी छ ।’
यस्तै उनले योजनावद्ध विकास नगरे गन्तव्यमा पुग्न नसकिने बताए । प्रधानमन्त्री ओलीले सरकारले तिव्र विकासलाई तिव्र गतिमा बढाउनु पर्ने भएकोले योजनावद्ध रुपमा अघि बढ्नु आवश्यक रहेको बताए ।
