कर्मचारी समायोजन अध्यादेश आउँदै गर्दा मन्त्री पण्डितले भने, ‘पुसभित्रै कर्मचारी व्यवस्थापन हुन्छ’
काठमाडौं, १९ मंसिर । कर्मचारी समायोजन अध्यादेश राष्ट्रपतिबाट प्रमाणकीकरण हुने अवस्थामा रहेका बेला संघीय मामिला तथा स्थानीय विकासमन्त्री लालबाबु पण्डितले अब कर्मचारी समायोजनको कामले तीब्रता लिने बताएका छन् ।
उनले सरकारले पुस मसान्तभित्र प्रदेश र स्थानीय तहमा आवश्यक कर्मचारीको व्यवस्थापन गरिसक्ने दावी गरेका छन् । मन्त्री पण्डितले प्रदेश र स्थानीय तहका लागि आवश्यक प्राविधिक कर्मचारी करारमा लिएर काम गर्ने व्यवस्था मिलाइएको दावी गरेका छन् ।
उनले कर्मचारी समायोजनका लागि सरकारले संघीय निजामती सेवा ऐन र कर्मचारी समायोजनसम्बन्धि ऐन मन्त्रिपरिषद बैठकमा पेश गरिएको समेत जानकारी दिए ।
संघ, प्रदेश र स्थानीय तहबीचमा देखिएको समस्याबारे छलफल गर्न बुधबार आयोजित संघीय संसदको राष्ट्रिय सरोकार तथा समन्वय समितिको बैठकमा बोल्दै मन्त्री पण्डितले कर्मचारीलाई कर्मक्षेत्रमा पनि निष्पक्ष रुपमा खटाउने प्रतिवद्धता व्यक्त गरे । मन्त्री पण्डितले आवश्यक्ताका आधारमा मात्रै स्थानीय र प्रदेश तहमा कर्मचारीको व्यवस्थापन गर्ने योजना पनि अघि सारे ।
कतिपय प्रदेश तहका कर्मचारी घाम तापेर बस्ने गरेको उल्लेख गर्दै उनीहरुलाई पनि काममा लगाउने गरी सरकारले कर्मचारीको उचित व्यवस्थापन गर्ने तयारी भएको मन्त्री पण्डितको भनाई छ । ‘कार्य क्षेत्रमा जान नचाहने कर्मचारीमाथि कडा कार्वाही गर्न सरकार बाध्य हुन्छ’ उनको चेतावनी छ ।
मन्त्री पण्डितले संघ, प्रदेश र स्थानीय तहबीचको सहकार्य सहज रुपमा भईरहेको दावी समेत गरेका छन् । उनले स्थानीय र प्रदेश तहमा कर्मचारीको अभाव हुन नदिन सरकारले गत असारमै कर्मचारीको दरबन्दी स्वीकृत गरेको दावी गरेका छन् ।
