इण्डियन ओपनमा नेपाललाई पहिलो पदक
नयाँ दिल्लीमा जारी इण्डियन ओपन अन्तर्राष्ट्रिय बक्सिङ प्रतियोगितामा नेपालले पहिलो पदक जितेको छ । प्रतियोगितामा नेपालकी विमला श्रेष्ठले काँस्य पदक जितेकी छन् ।
दिल्लीस्थित त्यागराज स्पोर्ट्स कम्प्लेक्समा आइतबार राति वेन्टम ५४ किलो समूहकी विमलाले क्वार्टर फाइनलमा ताजिकिस्तानकी फार्डिया सामिएभालाई पराजित गर्दै काँस्य पदक हात पारेकी हुन् । त्रिभुवन आर्मी क्लबकी विमलाले ताजिकिस्तानकी फार्डियालाई आरएसीको आधारमा पराजित गर्दै सेमिफाइनलमा स्थान बनाउँदै काँस्य पक्का गरेकी हुन् । विमलाको यो पहिलो अन्तर्राष्ट्रिय पदक हो । विमलाले दोस्रो अन्तर्राष्ट्रिय प्रतियोगितामा नेपाललाई पदक दिलाएकी हुन् ।
नेपाललाई पहिलो पदक दिलाएपछि विमलाले स्वर्ण र रजत जित्ने लक्ष्य लिएको बताइन् । अब विमलाले सेमिफाइनलमा मंगलबार भारतीय खेलाडी मनिषासँग खेल्नेछिन् । विमला नेपाल बक्सिङ संघले गत पुसमा भएको राखेप च्याम्पियनसिप अन्तर्गतको २७ औं पुरुष तथा आठौं महिला खुला बक्सिङ प्रतियोगितामा उत्कृष्ट फाइटर बनेकी थिइन् ।
नेपालले भारतमा सम्पन्न १२ औं दक्षिण एसियाली खेलकुद (साग) मा पदक जितेपछि यो पहिलो अन्तर्राष्ट्रिय पदक जितेको हो । प्रतियोगितामा नेपाल र आयोजक भारतसहित २३ राष्ट्रको सहभागिता रहेको छ । प्रतियोगिता अन्तर्गत नै पुरुषतर्फ नेपालका विष्णुप्रसाद घलेले क्वार्टर फाइनलमा स्थान बनाएका छन् । वेल्टर ६९ किलो समूहका बिष्णुले अफगानिस्तानका वासुद्दिन घाव्सीलाई अंकको आधारमा पराजित गरे । आर्मी क्लबकै विष्णुले वासुद्दिन घाव्सीलाई ३–२ ले हराएका छन् ।
