विमल घर्तीमगर मोहन बगानमा अनुबन्धित, व्यावसायिक खेल यात्रा शुरु
काठमाण्डौं, १६ माघ : नेपाली फुटवलका चर्चित स्टाइकर विमल घर्तीमगर भारतको शीर्ष डिभिजन आई–लिग टोली मोहन बगानमा अनुबन्ध भएका छन् । योसँगै उनको व्यावसायिक फुटवल यात्रा पनि शुरु भएको छ ।
राष्ट्रिय टोलीमा डेब्यू गरेको झण्डै साढे ५ वर्षपछि फरवार्ड विमल घर्तीमगरले पहिलोपल्ट व्यावसायिक फुटवल यात्राका लागि मोहन बगानसँग सम्झौता गरेका हुन् । बंगलादेशविरुद्धको मैत्रीपूर्ण खेलमा १४ वर्ष छँदै पहिलो रोजाइबाट डेब्यू गरेका विमललाई नेपाली फुटबलसँग नजिकको सम्बन्ध गाँसेको कोलकाता शहरकै पूरानो क्लब मोहन बगानले व्यावसायिक फुटबलमा निम्त्याएको हो ।
युरोपका विभिन्न टोलीमा प्रशिक्षण र नेपालका शीर्ष टोलीबाट मोफसल फुटबलको अनुभव बटुलेका २० वर्षीय विमलले अब आई लिगमा खेल्ने छन् । मोहन बगानले विमललाई यस सिजनको अन्त्यसम्म अनुबन्धन गरेको जनाएको छ । केही दिनअघि नेपाली राष्ट्रिय टोलीका गोलरक्षक किरण चेम्जोङ पनि आई लिगकै मिनरेभा पन्जाब एफसीमा अनुबन्धित भएका थिए । किरण पनि सिजनको अन्त्यसम्म त्यहाँ रहने छन् । अनुबन्धित भएलगत्तै विमलले भारतीय फुटबलमा मोहन बगानबाट प्रतिनिधित्व गर्न पाउँदा हर्षित भएको बताएका छन् । विमल भन्छन्–‘अब टोलीलाई मैदानमा जित दिलाउने मेरो लक्ष्य हुनेछ ।’