प्रदेश–३ को स्थायी राजधानी हेटौंडा नै हुन्छ : मुख्यमन्त्री पौडेल
मकवानपुर, ६ फागुन : प्रदेश नम्बर–३ का मुख्यमन्त्री डोरमणि पौडेलले प्रदेशको स्थायी राजधानी हेटौंडा नै कायम हुने बताएका छन् । हेटौंडा उपमहानगरपालिकाको दोस्रो नगरसभा बैठकको आइतबार उद्घाटन गर्दै मुख्यमन्त्री पौडेलले हेटौंडामा आइसकेको राजधानी कुनै पनि हालतमा नसर्ने दावी गरे । 
हेटौंडा राजधानीका लागि उपयुक्त भएको भन्दै उनले अहिले राजधानी जहाँ छ त्यहिँ नै हुने धारणा व्यक्त गरे । अहिलेसम्म ९० प्रतिशत कर्मचारी कामका लागि नआएका कारण काम गर्न समस्या भएको उनको भनाई छ । सरकारी कर्मचारी सिंहदरवारबाट तल झर्न नचाहेकाले पनि काम गर्न अप्ठ्यारो भएको उनको आरोप छ ।
उनले हेटौँडालाई आधुनिक शहरको रुपमा विकास गर्नका लागि आफू लागि परेको बताए । त्यसका लागि सबैको साथ र सहयोगको आवश्यकता रहेको उनको भनाई थियो । कार्यक्रममा बोल्दै हेटौंडा उप–महानगरपालिकाका मेयर हरिबहादुर महतले हेटौंडालाई देशकै नमूना शहरको रुपमा विकाश गर्न आफू लागिपरेको बताएका छन् ।
