राजेन्द्र महतोले नरमायालाई सांसद बनाएपछि तात्तियो राजपादेखि सामाजिक सञ्जाल
दुई करोड दिएर सांसद बनेको नरमायामाथि आरोप
काठमाण्डौं, ६ फागुन : राष्ट्रिय जनता पार्टी (राजपा) बाट पार्टीकै कार्यकर्ताहरुले नचिनेकी नरमाया ढकाल समानुपातिकबाट प्रतिनिधि सभा सदस्य चुनिएपछि अहिले पार्टी र सामाजिक सञ्जालमा ढकालको चर्चा चुलिएको छ । खसआर्य सूचीबाट नरमाया सांसद बनेपछि अहिले पार्टीका नेताहरुले नै खैलाबैला मचाएका छन् । पहिलो पटक खसआर्यको सूचीबाट रेणु शर्माको नाम राजपाले निर्वाचन आयोगमा पठाएको थियो । निर्वाचन आयोगले नाम सच्याएर पठाउन पत्र पठाएपछि नरमायाको नाम पठाउन राजपा बाध्य भएको हो ।
नेताले नै चिन्दैनन् नरमाया
एकाएक आफ्नो पार्टीबाट नरमाया सांसद बनेपछि राजपाका शीर्ष नेता नै नमज्जाले छक्क परेका छन् । सामान्य कार्यकर्ता मात्रै नभएर अध्यक्षमण्डलका सदस्यहरु नै नरमायालाई नचिनेको भन्दै सामाजिक सञ्जाल तताइरहेका छन् । राजपा अध्यक्ष मण्डलका सदस्य राजेन्द्र महतोले मात्रै नरमायालाई चिन्ने गरेको राजपाका एक नेताले व्यङग्य गर्छन् । महतोको जोडबलमा नै उनलाई समानुपातिक सूचीमा राखिएको उनले जानकारी दिए । खसआर्यको सूचीमा एक नम्बरमा नरमायाको नाम भएकाले उनी सांसद बन्ने सौभाग्य पाएकी छन् ।
अहिले नरमायाले सांसद बन्न २ करोड दिएका कुरा समेत सामाजिक सञ्जालमा भाइरल भइरहेको छ । मधेस आन्दोलनमा सहभागी नभएको व्यक्तिलाई पैसा बलमा सांसद बनाइएको आरोप राजपा नेताहरुको छ । राजपा जुनसुकै नेतालाई नरमाया ढकालबारेमा सोध्दा महतो वा अनिल महासेठलाई सोध्नु भन्ने प्रतिक्रिया दिने गरेका छन् । नरमायाका आफन्तले उनले पार्टीलाई २ करोड दिन सक्ने हैसियत नभएको बताउँछन् । ‘उनी सामान्य परिवारकी हुन् , उनको पैसा दिएर सांसद बन्ने हैसियत छैन,’ उनका एक आफन्तले भने । तत्कालीन सदभावना एवम् हालको राजपाका महामन्त्री मनिष सुमनले पनि आफूले नरमायालाई नचिनेको बताए । उनले छोटो भने, ‘म चिन्दिनँ, मैले तस्बिर समेत देखेको छैन ।’ नरमायाको सामाजिक सञ्जालको तस्विर भने कुनै कलाकार भन्दा कम छैन ।
को हुन् नरमाया ?
एक गैरसरकारी संस्थामा कार्यरत नरमाया काठमाडौंमा बसेर सदभावनाको पार्टी राजनीतिमा सक्रिय रहेको उनीहरुको समाचार स्रोत बताउँछ । ढकालको नागरिकता स्याङ्जाको छ । उनको विवाह चितवनमा भएको छ । अहिले काठमाडौँको बत्तिसपुलतीमा उनको स्थायी बसोबास छ । नागरिकता स्याङ्जाको भएका कारण मधेसमा उनको आलोचना भएको हो । उनले विगतमा मधेस आन्दोलनमा कुनै योगदान नदिएका कारण पनि आलोचना भएको हो । नरमाया पक्षका एक नेताले ६ वटा दल मिलेर बनेको राजपाको ८१५ सदस्यीय केन्द्रीय कमिटीमा सबैको एक अर्काका चिनजान नरहेको बताएका छन् । ‘६ वटा दलका मिलेर राजपा बनेको छ , यहाँ ८१५ जना बीच कहाँ एक अर्कामा चिनजान छ ?’उनले भने । उनले खसआर्यबाट नै सांसद बनाउनु पर्ने संवैधानिक व्यवस्थाका कारण नरमाया सांसद बनेको दावी गरे ।
