प्रचण्डले भने, ‘पहिलोपल्ट दुई तिहाई बहुमतको कम्युनिष्ट सरकार बन्दैछ’
काठमाण्डौं, ११ फागुन : नेकपा माओवादी केन्द्रका अध्यक्ष पुष्पकमल दाहाल प्रचण्डले पहिलोपल्ट दुई तिहाइ बहुमतको कम्युनिष्ट सरकार गठन भइरहेको बताएका छन् ।
उनले संघीय समाजवादी फोरम सरकारमा सामेल भई पहिलो पटक कम्युनिष्ट नेतृत्वको सरकार दुई तिहाई बहुमतको बन्न लागेको दावी गरेका छन् । उनले उपेन्द्र यादव नेतृत्वको पार्टी पनि सरकारमा सहभागी भई पहिलो पटक नेपालमा वामपन्थीको नेतृत्वमा दुई तिहाई बहुमतसहितको सरकार बन्न लागेको बताएका हुन् ।
शुक्रबार काठमाडौंमा आयोजित कार्यक्रममा प्रचण्डले एमालेसँगको पार्टी एकता गर्ने निर्णय जनयुद्ध शुरु गर्नुभन्दा पनि ठूलो उपलब्धि भएको दावीसमेत गरे । प्रचण्डले दुई पार्टीबीचको एकताबाट आम जनतामा खुशी छाउनु ठूलो उपलब्धी भएको बताए । उनले वामपन्थी एकताबाट दक्षिणपन्थी शक्तिहरु आतंकित भएको भन्दै सचेत रहन पार्टीका नेता, कार्यकर्तालाई आग्रह गरे ।