प्रधानन्यायाधीशले बोलाए ‘फुलकोर्ट’ बैठक
काठमाडौं, २ मंसिर । सर्वोच्च अदालतमा कात्तिक ८ देखि जारी गतिरोध लम्बिँदै गइरहेका बेला प्रधानन्यायाधीश चोलेन्द्र शमशेर जबराले आज (बिहीबार) पूर्ण वैठक ‘फुलकोर्ट’ बैठक बोलाएका छन् ।
सर्वोच्च अदालतमा आफूविरुद्धको आन्दोलन शिथिल हुने अवस्था नदेखेपछि निकासका विकल्प खोज्न जबराले फुलकोर्ट बैठक बोलाएका हुन् । यो बैठकमा जबराले सर्वोच्चमा हरिकृष्ण कार्की नेतृत्वको समितिले दिएको प्रतिवेदन कार्यान्वयनबारे निर्णय लिन सक्ने बताइएको छ ।
सर्वोच्च अदालतमा आन्दोलनरत १३ न्यायाधीशहरू ‘फुलकोर्ट’ बोलाउन तयार भएका थिए । यसअघि नेपाल बार एशोसिएसनले जबरालाई शुक्रबारसम्म राजीनामा दिन अल्टिमेटम दिए थियो । तर बिहीबार बिहान जबरालाई रोक्न खोज्दा बारका सदस्य र प्रहरीबीच झडप हुँदा २० बढी घाइते भएका छन् ।
