एसिया कप क्रिकेटका लागि १७ सदस्यीय नेपाली टोली घोषणा
काठमाडौँ । नेपाली क्रिकेट संघ (क्यान) ले एसिया कप–२०२३ का लागि १७ सदस्यीय नेपाली टोली घोषणा गरेको छ । आज (सोमबार) नेपाली क्रिकेट टिमका मुख्य प्रशिक्षक मोन्टी देसाईले रोहितकुमार पौडेलको कप्तानीमा १७ सदस्यीय टोलीको घोषणा गरेका हुन् ।
एसिया कप अगस्ट ३० देखि सेप्टेम्बर १७ सम्म पाकिस्तान र श्रीलङ्कामा हुनेछ । समूह ‘ए’ मा नेपालसहित भारत र पाकिस्तान छन् । यस्तै समूह ‘बी’ मा बङ्गलादेश, श्रीलङ्का र अफगानिस्तान छन् । नेपालले पहिलो खेल अगस्ट ३० मा पाकिस्तानसँग मुल्तानमा खेल्ने छ । यस्तै नेपालले दोस्रो खेलमा सेप्टेम्बर ४ मा भारतसँग श्रीलङ्कामा खेल्नेछ । नेपालले पहिलो पटक एसिया कप खेल्न लागेको हो ।
हरेक समूहका शीर्ष दुई टोली ‘सुपर ४’ मा पुग्नेछन् । ‘सुपर ४’ पछि शीर्ष २ टोलीले फाइनल खेल्ने छन् । एसिया कपअघि नेपालले पाकिस्तानको कराँचीमा स्थानीय टिमसँग अभ्यास खेल खेल्ने छ ।
को–को छन् टोलीमा ?
रोहितकुमार पौडेल (कप्तान), आसिफ शेख (विकेटकिपर), कुशल भुर्तेल, ललित राजवंशी, भीम सार्की, कुशल मल्ल, दीपेन्द्रसिंह ऐरी, सन्दीप लामिछाने, करण केसी, गुलसन झा, आरिफ शेख, सोमपाल कामी, प्रतिस जिसी, किशोर महतो, सन्दीप जोरा, अर्जुन साउद र श्याम ढकाल ।
