पशुपतिको जलहरी प्रकरण : सदस्य सचिव ढकाल तीन लाख धरौटीमा रिहा
काठमाडौं । विशेष अदालतले पशुपतिको जलहरी निर्माण भ्रष्टाचार मुद्दामा आरोपित पशुपति क्षेत्र विकास कोषका तत्कालीन सदस्य सचिव डा. प्रदीप ढकाललाई तीन लाख धरौटीमा रिहा गर्न आदेश गरेको छ ।
विशेष अदालतमा आज (बुधबार) उपस्थित ढकाललाई न्यायाधीशहरु खुशीप्रसाद थारु, रामबहादुर थापा र रितेन्द्र थापाको इजलासले तीन लाख धरौटी माग गरेको हो । केही दिनअघि निलम्बित सदस्य सचिव मिलनकुमार थापा तीन लाख रुपैयाँ धरौटीमा छुटेका थिए । उनी पुसको २५ गते धरौटी बुझाएर रिहा भएका थिए ।
अख्तियार दुरुपयोग अनुसन्धान आयोगले पशुपतिनाथ मन्दिरमा जलहरी राख्दा भ्रष्टाचार भएको भनी कोषका सदस्य सचिव थापासहित तत्कालीन सदस्य सचिव डा. प्रदीप ढकाल र अरुण श्रेष्ठविरुद्ध एक करोड १७ लाख रुपैयाँ बिगो मागदाबी गरी विशेष अदालतमा मुद्दा दायर गरेको थियो । विशेष अदालतका सदस्यहरु डा. खुसीप्रसाद थारु र रामबहादुर थापाको इजलासले डेढ किलो सुन हिनामिना गरेको आरोप लागेका तत्कालीन कोषाध्यक्षसमेत रहेका मिलन थापासँग तीन लाख रुपैयाँ धरौटी मागेको थियो ।