महिला फुटबल टोलीलाई एनआइसी एसिया बैंकको नगदसहित सम्मान
काठमाडौं। एनआइसी एसिया बैंकले वाफ महिला च्याम्पियनसिपमा दोस्रो भएको नेपाली महिला राष्ट्रिय फुटबल टोलीलाई नगदसहित सम्मान गरेको छ ।
बैंकले सोमबार महिला टोलीका २३ खेलाडी र अफिसियल गरि ३१ जनालाई जनही २५ हजार रुपैयाँले सम्मान गरेको हो । होटल हिमालयनमा विशेष कार्यक्रम आयोजित गरेर बैंकले अन्तर्राष्ट्रिय स्तरमा उत्कृष्ट प्रर्दशन गरेर राष्ट्रको गरिमा उच्च राख्न अतुलनीय योगदान गरेको भन्दै राष्ट्रिय महिला फुटबल टोलीलाई सम्मान गरेको हो ।
सम्मान कार्यक्रममा अखिल नेपाल फुटबल संघ (एन्फा का अध्यक्ष पंकज विक्रम नेम्वाङले महिला टोलीको उच्च प्रदर्शनको लागि बधाई दिँदै सन् २०२७ र २०३१ को विश्वकप खेल्ने लक्ष्य लिएर टोलीलाई वाफ च्याम्पियनसिपमा भाग लिन पठाएको बताए ।
महिला टोली मुख्य प्रशिक्षक राजेन्द्र तामाङले महिला टोलीले वाफ च्याम्पियनसिपमा गरेको प्रदर्शन र यस्ता खाले सम्मानले सम्मानले पुरुष टोलीलाई पनि प्रेरणा दिएको बताए । महिला टोलीकी कप्तान एन्जिला तुम्बापो सुब्बाले सम्मानका लागि एनआइसी बैंकलाई धन्यवाद दिदै यस्तो सम्मानले खेलाडीको मनोबल बढ्ने बताइन् ।
फागुनमा साउदी अरबमा भएको वाफ च्याम्पियनसिपमा भाग लिएको नेपाली टोली पहिलो सहभागितामा नै फाइनल पुगेको थियो । जोर्डनसँग फाइनलमा ५–३ ले पराजित हुनुअघि खेलमा २–२ को बराबरी भएको थियो ।
एनआईसी एसिया बैंकका सहायक प्रमुख कार्यकारी अधिकृत सन्तोष कुमार राठीले महिला टोलीको असाधारण सफलताका कारण सम्मान गरिएको बताए । सोही अवसरमा बैंकले राष्ट्रिय टोली र त्रिभुवन आर्मी क्लबकी गोलकिपर अन्जना रानामगरलाई आफ्नो ब्राण्ड प्रमोटरको रुपमा घोषणा गरेको थियो । अहिलेको सम्झौता एक वर्षको रहने बताएको छ ।
