घरबाट फर्पिङको होस्टेल हिंडेकी संगीता एक महिनादेखि बेपत्ता, चिन्तामा परिवार
ललितपुर । ललितपुरको टीकाभैरव बस्दै आएकी एक किशोरी एक महिनादेखि सम्पर्कविहीन हुँदा परिवार चिन्तामा परेका छन् । कैलाली लम्कीचुहा नगरपालिका–५ घर भई हाल गोदावरी नगरपालिका–६ टीकाभैरव बस्ने १५ वर्षीया संगीता चौधरी करिब एक महिनादेखि बेपत्ता भएकी हुन् ।
लेले आनन्द वन अस्पतालमा कार्यरत रामबहादुर चौधरीकी छोरी संगीता गत वैशाख १६ गतेदेखि हराएकी हुन् । उनी फर्पिङस्थित त्रिभुवन आदर्श माध्यमिक विद्यालयमा ६ कक्षामा पढ्थिन् । वैशाख १६ गते टीकाभैरवबाट दिदी अनितासँगै फर्पिङस्थित बाल निकेतन होस्टेल जान भनेर हिंडेकी संगीता त्यही साँझबाट हराएकी बुबा रामबहादुरले जानकारी दिए ।
दिदी अनिता बहिनीलाई होस्टेल पुर्याएर फर्केकी थिइन् । तर संगीता केहीबेरमै लगनखेल आएकी थिइन् । दिदी अनिताले आउनुको कारण सोध्दा पैसा हराएकाले फर्किएर आएको सुनाएकी थिइन् ।
त्यसपछि अनिताले पैसा दिएर उनलाई होस्टल फर्काएकी थिइन् । पछि साँझ ७ बजेतिर होस्टलमा फोन गर्दा संगीता नआएको जानकारी पाएको रामबहादुरले बताएका छन् । उनले गत वैशाख १७ गते सोमबार महानगरीय प्रहरी वृत्त चापागाउँ पछि जावलाखेल प्रहरी परिसरमा उजुरी दिएका थिए । श्रीमतीसहित पाँच छोरी र एक छोरा भएका रामबहदुर १० वर्षदेखि टीकाभैरवमा बस्दै आएका छन् ।
